Maniitsoq
Olivinisiorfimmut mianersortumik soqutiginnittoqartoq
Suliffeqarfiit pingasut Seqimi aatsitassarsiorfimmut soqutiginnillutik saaffiginnissimapput
Aningaasaqarnermut Aatsitassaqarnermullu Naalakkersuisoqarfik aatsitassarsiorfinnit pingasunit saaffigineqarsimavoq, taakku Maniitsup eqqaani Seqimi olivineqarfimmut soqutiginnipput.
Inatsisartunut ilaasortamut Siverth K. Heilmannimut Atassummersuumut suliaq pillugu apeqquteqartumut, naalakkersuisoqarfik taama ilisimatitsivoq.
Ingerlatseqatigiiffiit taakku pingasut ukuupput, Steinsvik Olivin AS, Olivine Group aamma North American Nickel.
Apeqquteqartut
- Saaffiginninnerit taakkua qinnuteqaatitut isigineqassanngillat, kisianni Seqip sumiiffia pillugu pisortatigoortuunngitsumik apeqquteqaatituunerusoq isigineqassallutik, naalakkersuisoq Randi Vestergaard Evaldsen akissuteqarpoq.
- Sumiiffik aamma aatsitassaq taanna pillugu periarfissat paasissutissallu, aatsitassanut oqartussaasup nuisitsinerni ataatsimeersuarnernilu assigiinngitsuni nittarsaassisarneranni annikinnerusumik ilaatinneqartarpoq. Taamaattumik aatsitassanut oqartussaasoq aamma ingerlatseqatigiiffinnit assigiinngitsunik, nalunaarsorsimanngitsunit, pisortatigoortuunngitsumik apeqquteqarfigineqartarpoq, taanna ilanngullugu oqarpoq.
Atuaruk: Olivinisiorfik matuvoq
2010-imi matuneqartoq
Aatsitassap akia appasimmat aningaasartuutillu annertummata olivinisiorfik 2010-imi matuneqarpoq.
Minelco A/S aatsitassarsiornermik taamani ingerlatsisup piaasinnaanermut akuersissut utertippaa, aatsitassarsiorfillu matuneqarluni. Kisianni suliffeqarfiup suli tulattarfik suli pigaa, Randi Vestergaard Evaldsen (D) ilisimatitsivoq.