avatangiisit
Oliespild: Sukkasuumik iliuuseqarnissaq pingaaruteqarpoq
Imaani uuliaarluernermi upalungaarsimasut sukkasuumik pitsaasumillu iliuuseqarnissaannik filmiliakkut ilinniusiutikkut nutaakkut ilinniartinneqassapput
Uuliaarluerneq erloqinartuuvoq avatangiisinut ulorianaateqarmat.
– Ajutoortoqartillugu uuliaarluernermi sekundilalunnguit apeqqutaapput. Pingaaruteqartorujussuuvoq upalungaarsimasutta sukkasuumik pikkorissumillu iliuuseqarnissaminnut piareersimanissaat. Uuliaarluernermi atortut, nunami siammarsimallutik sumi tamaaniittut, atornissaat ilisimalluassavaat, avatangiisinut pinngortitamullu Naalakkersuisoq Kim Kielsen oqarpoq, taannalu atortut atornissaannik filmimik ilinniusiamik sanatitsisimavoq.
Filmimi takutinneqarput sinerissamut qanittumi uuliaarluernermi atortut qanoq atorneqarsinanallutillu aserfallatsaalineqassasut. Taamatut tusagassiorfinnut nalunaaruteqarpoq Avatangiisinut Pinngortitamullu Naalakkersuisoqarfik.
– Filmikkut soorunami sungiusarnerit taarserniarneqanngillat, sulisunilli ilinniartitsinerup ilagaa, Kim Kielsen oqarpoq.
Avatangiisinut Pinngortitamullu Naalakkersuisoqarfiup nunatta imartaani uuliaarluernermut upalungaarsimaneq akisussaaffigaa. Uuliaarluernermut upalungaarsimanermi nunatsinni illoqarfinni 12-ni sulisoqarlunilu atortoqarpoq, qatserisarfinni aallaavilinnik. Nunami tamarmi sungiusartoqartarpoq sulisut piginnaasaat attatiinnarumallugit, taamaasilluni ajutoortoqarnerani upalungaarsimasut tamatigut piareersimasassammata, naalakkersuisoqarfik tusagassiorfinnut nalunaarummi allappoq.