Qaasuitsup Kommunia
Ole Dorph uumisuttoq: Lars Lennert-Sandgreen atorfimminit soraarpoq
Qaasuitsup Kommuniani pisortaanerusimasup Lars Lennert-Sandgreenip atorfimminiikkunnaarneranut atatillugu paaserusunneqartut amerlatsikkiartorput
- Kommunalbestyrelsi sinnerlugu nalunaarutigissavara, Qaasuitsup Kommuniani pisortaaneq Lars Lennert-Sandgreen suliffimminit soraarniarluni nalunaaruteqarmat, tamannalu akuersaarsimavara. Lars Sandgreen septembarimi 2013-imiilli pisortaanertut atorfeqarpoq.
- Kulturimut, Atuartitaanermut Sunngiffimmilu sammisassaqartitsinermut maannakkut pisortaasoq, Hans Eriksen Qaasuitsup Kommuniani pisortaanertut ivertinneqarallarpoq.
Qaasuistsup Kommuniani borgmesteri Ole Dorph, Siumut, naatsumik tusagassiutinut nalunaarummi allappoq.
Lars Lennert-Sandgreenip Qaasuitsup Kommuniani pisortaanertut atorfeqarunnaarnera KNR-imit nalunaarutigineqartareerpoq, sooq atorfimminit soraarnersoq ilisimaneqanngilaq.
Qaasuitsup Kommuniani susoqarnersoq inunnit amerlanngitsunit ilisimaneqarpoq. Atorfimmi sooq taama pingaaruteqartigisumi innuttaasut paasitinneqannginnissaat kissaatigineqannguatsiarpoq.
- Ole Dorph, Lars Lennert-Sandgreen sooruna atorfimminit soraarpa, aamma qanga soraarpa?
- Pisoq pingaaruteqanngilaq, aamma pisoq naammassereersutut isigaara.
- Suna pisoq?
- Soqutaanngilaq. Oqaaseqaqqissanngilanga.
- Soraarsitaagami? Sooruna? Aamma...
- Oqaaseqarfigissanngilara. Inuulluarina! Isumaluttup Ole Dorphip oqarasuaat ilivaa.