NunaMinerals

Ole Christiansen: Siumup naalakkersuinikkut siuttunngornera pitsaanngitsumik kinguneqartitsivoq

- Royaltyp atuutilernera aatsitassarsioqatigiiffinnik qimaatitsivoq, Nunamineralsip pisortaanera Ole Christiansen oqarpoq. Pisortaanertut tunuarnissani ataasinngormat nalunaarutigaa

Pisortaaneq Ole Christiansen, Nunamineralsip immikkut ittumik ataatsimeersuarnerani Hotel Hans Egedemi Nuummi januaarip 29-ani ingerlanneqartumi assilineqartoq

Nunatsinni politikkikkut sangujoraarluni ingerlasoqarnera pissutaalluni Nunamineralsip ukiuni kingullerni ineriartornera ajoqquserneqarpoq.

Nunamineralsimi pisortaajunnaarniarlini ataasinngornermi nalunaaruteqartoq, Ole Christiansen, oqarpoq.

- Inatsisartunut 2013-mi qinersisoqarnera Kalaallit Nunaanni aatsitassarsioqatigiiffinnut eqquivoq annertuumik, ingerlatsiveqatigiiffiup immikkut ittumik ataatsimeersuarnerani Ole Christiansen sisamanngormat oqarpoq.

- Royaltyp atuutsilersinneqarneratigut akileraarusiisarnerit amerlineqarput, naak aatsitassat nalingi appariartortut. Tamanna aningaasaliiniartut qimarrannerannik kinguneqarpoq. Suliffeqarfimmik millioninik naleqartumik isumaqatigiissuteqaraluarpugut. Taakku piffissaq kingullerpaaq atorlugu tunuarput, Hotel Hans Egedemi Ole Christiansen sisamanngormat oqarpoq.

Siumut isornartorsiorneqarpoq
Taamaasilluni pisortaanerup tunuarniarluni nalunaaqqammersup Siumup Naalakkersuinikkut aqutsinera isornartorsiorpaa. Aatsitassarsiornermi akileraartarneq Siumup 2013-mi allanngortippaa.

Nunamineralsip siunissaa suli qanoq isikkoqassanersoq ilisimaneqanngilaq.

Ole Christiansenip Sermitsiaq.AG-mit apeqqutigineqartut amerlanerusut akerusunngilai.

- Ingerlatsiveqatigiiffiup inissisimanera pillugu siulersuisuni ilaasortaasut nalilersuissapput. Piffissaq sivisunngitsoq qaangiuppat tusarliussisoqassaaq, Nunaminerals ataasinngornermi allappoq.

Naalakkersuisunut siulittaasoq Kim Kielsen apersorneqarnissaa maannakkut Sermitsiaq.AG-mit apersorniarlugu sulissuteqarpoq.

Nunaminerals Kalaallit Nunaanni ujarassiornikkut ingerlatseqatigiiffinni siuttuuvoq.

Powered by Labrador CMS