Saturday, January 7, 2017 - 11:25

Odensimi juulli naggaserneqarpoq

Assi.: Knud Fl. Larsen
Odensemi kunngit pingasuni naalagiaqatigiittoqarmat erinarsoqatigiit Umiakkut tussiartuupput

Odensemi pisarnertut kunngit pingasuni naalagiaqatigiittoqarpoq. Naalagiaqatigiinnerlu Kalaallit illuata Odensemiittup Thomas Kingos Kirke suleqatigarlugu aaqqissuuppaa.

Ukiut siulii assigalugit amerlasuut juulli kunngit pingasuni naalagiaqatigiinnermi naggasernissaanut ukiortaamullu iserluaqqusinermi peqataapput. Kunnginilu pingasuni juulli naggaserneqartarmat naalagiat nalliuttorsiorpaluttunik atisaqarlutik peqataapput, naggammillu juullip orpiliaanik ikitseqatigiilutik.

Kalaallisut danskisullu

Naalagiarneq kalaallisut danskisullu ingerlanneqarpoq. Palasi Oline Berthelsen Thomas Kingos qaluffiata palasia Eva Götke peqatigalugu naalagiarneq ingerlanneqarluni. Tussiarneq kalaallisut danskisullu ataatsikkut ingerlavoq, tussiutigineqartullu versii amerlaqatigiinngikkaluartut soqutigineqarani.
Taamatullu aaqqissuussisoqartillugu erinarsoqatigiit Umiakkut pisarnermisut tussiaqattaarput. Erinarsoqatigiillumi tusarnerluinnartut juullerpalaarnermut tulluartunik tussiaqattaarlutik.

Ileqqoq nuannersoq

Oqalufiup palasia Eva Götke oqaluussinermi ima oqarpoq:

- Kalaallit Nunaanni kunngit pingasut sumiiffinni amerlasuuni pingaartinneqarpoq. Danmarkimili taama pingaartinneqarunnaarsimalluni. Inuulluataarnermik pingaartitsisunut nutaaliortoqartuarneratigut juulli ullualuinnarni malunnartinneqartarpoq.

- Ulluni nutaaliorfiusuni pisiortorfiusunilu unillatsiarluni eqqarsarnissaq pingaaruteqarpoq. Ullutsinnilu qullerpassuaqalersimasumi sermersuarmullu aatsitsisumut ullorissat takujuminaallisimapput.

Guuterput

Juullikkunni kunngit pingasunilu naalagiarnermi Geeterput kingullertut tussiarneqartarnera pissusitoqqat ilagaat. Naalagiallu Rasmus Berthelsenip tussiusiaa atornerani nikuittarlutik. Naalagiarnermilu aamma tamanna mininneqanngilaq.

Pisarnertut nerliiviliartoqarlunilu kaffillertoqarpoq.

Seneste nyheder / Nutaarsiassat kingulliit