Odensemi Umiaq-mi ataatsimeersuarneq sivisooq

Suleqatigiinnermik ajornartorsiuteqarneq oqaaseq sakkukippallaaqaaq.

Kalaallit peqatigiiffianni Umiaq-mi siulersuisut qaammatini arlalinni iluamik suleqatigiissimanngillat. Tamanna pissutigalugu siulersuisunut ilaasortat sinnerisa, siulittaasoq Helga Nielsen siuttoralugu, naggataatigut siulersuisunut ilaasortat marluk, Mina L. Pedersen aamma Emilie Rosbach, siulersuisunit peersippaat.

Peersitsineq qaammatip ataatsip matuma siornatigut pimmat, taakkua marluk ataatsimeersuarnermi imminnut illersorsinnaasimanngillat. Peqatigiiffimmimi ilaasortaajunnaarsitaasimapput.

Ataatsimeersuarnermit malunnarnerusoq

Pisimasoq ataatsimeersuarnermi maluginiarneqarnersaasimavoq.

Siulersuisunut ilaasortanik marlunnik peersitsineq soorunami ataatsimeersuarnermi malunnarnersaavoq. Siulittaasumut tunuartumut Helga Nielsenimut iluaqutaanngilaq pisimasoq tamanna siulittaasup nalunaarutaani oqaatsimik ataasinnguamilluunniit eqqaangeqanngimmat.

Pisimasoq oqaluuserisanut ilaavoq, tassa peqatigiiffimmi ilaasortaq allagaqarsimammat, tassuuna peersitsinerup unioqqutitsinngitsuunera qularnartoqartinneqarluni, minnerunngitsumillu aalajangerneq silatusaarnersoq qularnartinneqarluni. Peersitsinerup oqaluuserineqarnerani siulersuisuni erqqissisimasoqannginnera kamanaatsuliortoqartarneralu oqaluttuarineqarpoq, nikassaalluni oqalunnerit, ilatsiinnarnerit kisermaassisumillu aqutseriaaseqartoqarnera.

Oqaaseq oqartussaaqataaneq eqqaaneqanngilaq. Sivisuumik oqallinnerup kinguneraa, ataatsimeersuartut amerlanerussuteqarluartut allakkatigut taasinikkut siulersuisut peersitsinerannik atorunnaarsitsinerat.

Mina L. Pedersenip Emilie Rosbachillu ilaasortaanermut akiliut akilerpaat, taavalu kalaallit peqatigiiffianni Umiaq-mi ilaasortanngoqqipput ataatsimeersuarnerullu sinnerani peqataasinnaallutik.

Ataatsimeersuarneq, arfininngormat ualikkut Nordatlantisk Husimi ingerlanneqartoq, akunnernik sisamanik sivisussuseqarpoq. Taamaattumik sivisuumik ataatsimeersuarnerup kingorna nereqatigiinneq tunngavissaqarluartumik nuannarineqaqaaq.

Siulersuisut nutaat

Ataatsimeersuarnerup kingorna Umiaq nutaamik aallarteqqissinnaalerpoq. Siulersuisunik nutaarluinnarnik toqqaasoqarpoq. Siulittaasoq immikkut qinerneqartarpoq. Manna tikillugu siulittaasuusimasoq Helga Nielsen piffissaq kingulleq atorlugu qinigassanngorteqqinniarluni aalajangerpoq. Qinigassanngortittut tallimat qineqqusaareersut ArnánguaK Hansen ukiuni tulliuttuni marlunni Umiap siulittaasuatut qinigaavoq.

Vittus Kalia aningaaserisutut toqqarneqarpoq siulersuisunullu ilaasortat allat tallimat tassaapput Stine Olsen, Augusta Larsen, Arnaq Hendriksen, Amanda Kalia aamma Amalie Olsen Sørensen.

Ukioq qaangiuttoq

Siulittaasup tunuartup Helga Nielsenip nalunaarummini peqatigiiffiup ingerlassimasai assigiinngitsut oqaluttuarai: Kalaallisut naalagiarnerit pingasut. Ataatsimut nereqatigiittarnerit. Oqalugiarnerit pikkorissarnerillu. Ukiumoortumik Umiarsualivimmi kulturfestivalimi aammalu Nordatlantisk Husimi Juullimut niuffannermi peqataanerit. Peqatigiiffiup pigisai annerpaat tassaapput erinarsoqatigiit erinarsorluartaqisut Umiaq Kor, assigiinngitsorpassuarnut atatillugu aliikkusersuisarsimasut.

Kalaallit Danmarkimi peqatigiiffiisa kattuffiat Inuit sinnerlugu ataatsimeersuarnermi peqataavoq Beathe Lynge Olsen.

Maanna siumut isiginiartoqalissaaq

ArnánguaK Hansen, 40-nik ukiulik social- aamma sundhedshjælperi, siusinnerusukkut Umiap siulersuisuini ilaasortaasimavoq. Sermitsiaq.AG-mik oqaloqatigineqarluni ArnánguaK Hansen oqarpoq:

– Siulersuisut nutaat sulilernissaat qilanaarisorujussuuvara. Nneriuppunga peqatigiinnikkut kulturikkullu aaqqissuussinerit amerlanerusut aallartissinnaassallutigit. Tassaasinnaapput banko, ataatsimut nereqatigiinnerit allallu ingerlassinnaasavut. Ilaasortanut katersuuttarfeqassaaq. Uagut kalaallit ikinnerussuteqartut ikittunnguuvugut, taamaattumik pingaaruteqarpoq assigiinngitsutigut nuannisaqatigiilluta ataatsimooqatigiittarnissarput.

– Aamma amerlanerusunik ilaasortaqalernissarput sulissutigissavarput, ArnánguaK Hansen oqarpoq.

Umiaq-mi siulittaasoq Odensemi Kalaallit Illuutaanni siulersuisunut ilaasortaasarpoq.

Assit ataani takukkit