relancering
Nyt design: Sermitsiaq itisiliinerusalerpoq
– Atuartartuvut aviisimi misigisanik nutaanik tunerusuppavut, Sermitsiap aaqqissuisuunera Poul Krarup oqarpoq
Aviisi naqitaq Sermitsiaq maanna nutaamik kusanarnerusumillu iluseqarluni saqqummertalerpoq.
– Taamasiorpugut Sermitsiaq suli nukittunerulersinniarlugu. Nutaamik ilusilersorneqarneratigut erseqqissarneqarpoq aviisi anguniagaqartuusoq ilisimasalinnillu suliarineqartartoq sammillugit inuussutissarsiorneq, inuiaqatigiit, politikki, aningaasarsiorneq kulturilu, aaqqissuisuuneq Poul Krarup oqarpoq.
– Upperaarput aviisini naqitani siuariartoqqinnissamut suli inissaqartoq. Pineqarput imarisai pitsaanerusut, tusagassiorneq pitsaanerusoq piffimmut naapertuuttumik poortorlugit, modernimik nutaaliaasumillu ilusilersorlugit, aviisip Sermitsiap nutaarluinnarmik ilusilersorneqarnera pillugu Poul Krarup nassuiaavoq.
– Aviisit naqitat nunani allani kinguariartorneq sorsuutigigaat nunami maani misigaarput aviisit soqutigineqaleraluttuinnartut, maannalu Tusagassaqartitsivok Sermitsiaq.AG kalaallisut tusagassiornermut suli annertunerusunik aningaasaliissuteqarpoq.
Suleriaatsit nutaat
Sermitsiap, tallimanngornerit tamaasa naqitanngorluni saqqummersartup, ilusilersugaanini taannarpiaq ukiorpaalunni atorsimavaa. Sapaatillu akunnerani uani aviisi nutaamik iluseqarluni saqqummerpoq, inuussutissarsiornermillu tusagassiat erseqqissaqqinneqarput aviisimi quppernernik aappilarujuttunik, nunani allani inuussutissarsiornermut aviisinit ilisimaneqartutut.
Sermitsiaq 2011-mi ukiakkulli ineriartortinneqalerpoq, nutaamillu ilusilersornera piviusunngorpoq, nutaarluinnarmik aaqqissueriaatsip eqqunneqarnera ilutigalugu, aaqqissuussinermi software nutaaq atorlugu. Neriunartumik tamanna atuartartutsinnut aviisimi misigisanik pitsaanerusunik kinguneqassaaq.
– Piffissami aningaasarsiornerup kinguariartornerani uninngaannarneraniluunniit, inuussutissarsiortutut ilisimasalittut marlunnik periarfissaqarpoq; tunitsiviit annaasat qissatigineqarsinnaapput imaluunniit aalajangertoqarsinnaavoq piffiit erloqinartut nukittornerusimallunii qaangerneqassasut, tunisassiat ineriartortinnerisigut ussassaarinerullu sakkortusineratigut, Poul Krarup nassuiaavoq.
Nettimi imaluunniit aviisimi naqitani tusagassiorneq
Ukiuni arlalinni nutaarsiassat nettimilu tusagassiorneq aviisinut naqitanut sakkortuumik unammillertuusimapput. Atuartartulli isorinninnerulersimapput, atuartartullu amerlanerpaat nettikkut tusagassiornerup aviisitigullu naqitatigut tusagassiornerup assigiinngissutaat pingaarnerit paasisimavaat.
Netti sukkasuumik nutaarsiassanut, qarsupiinnartunulli, pitsaasuuvoq. Maannakkorpiaq nutaarsiassat iluaqutaasumik online-mi pineqarsinnaapput nutaarsiassallu ineriartornerat akunnermiit akunnermut malinnaaffigineqarsinnaavoq.
Aviisinili naqitani itisiliinerit assigiinngissutillu atuarneqarsinnaapput. Tamakkuani oqaluttuat tamarmiusut, takussutissaqarnerusut suliarilluagaanerusullu atuarneqarsinnaapput.
Taamaattumik aviisit naqitat pinngitsooruminaapput sunut malinnaarusukkaanni.
– Netti naqitallu imminnut ilapittussapput, Poul Krarup tikkuaavoq.
Nettimi tusagassiorneq qimaguteqqissanani takkussimavoq, pitsaanerpaamilli sanilliunneqarsinnaavoq fast food-inut. Ajoquteqanngilaq. Pisariaqartitalli isummersorfissallu suli taamaallaat aviisimi pineqarsinnaapput, nettimiunngitsoq, Poul Krarup naliliivoq.
Aviisit naqitat soorunami aamma elektroniskinngorlugit pineqarsinnaapput.
Sermitsiaq sapaatip akunnerani saqqummersoq, tallimanngornerup ingerlanerani pisiniarfinnut annguttussaq, uani pisiarineqarsinnaalereerpoq: