Nunatsinnit qimaaneq?

- Nuuttartut amerlapput - nunamit inissisimaneq taama ajortigaa?

Ikinngutiginerpaasani amerlasuut Danmarkimut nutsermata, titartaasartoq ilisarisimaneqarluartoq Robert Holmene ernumassuteqarpoq. Nunamit nuttarnerit ataavartut kisitsisit takutippaat.

Robert Holmene Buuarsikkunnik titartaasarnerminit ilisiarisimaneqarpoq, tassani ulluinnarni pisut isummat akerlianik isumaqartarnerit takutittarpai. Maanna kisianni ulluinnarni takujualikkaminik ernumassutigisaminik maluginiagaqarpoq.

- Kalaallit Nunaanniuna susoqartoq?? Qaammatini marlunni kingullerni ikinngutiginerpaasama Danmarkimut nuunniarlutik nalunaarutigaat, taanna Facebookimi allappoq.

- Nuuttartut amerlangaarmata nuussimasunik tamatta ilisarisimasaqarnerput qularinngilara. Nunatsinni taama ajortigisumik inissisimavugut?, taanna nangilluni allappoq.

Taassuma allataa amerlasuunit qisuariarfigineqarpoq - ilaatigut inuit sooq nuussimanerlutik oqaluttuartut.

Nuuttartut
Kisitsisit qimerluulaaraanni qaammatini kingullerni nuuttartut amerlanerannik maluginiagaqarneranik kisitsisinik nassaassaqanngilaq. Naatsorsueqqissaartarfimmit kisitsisit nutaajunerpaat 2016-meerput. Kisianni ukiorpassuarni inuit Kalaallit Nunaanni inunngortut uteqqinnatik nuuttartut amerlanerulersimasut qularnaateqanngilaq.

1993-imi nuuttartut inuit 333-iupput. 2008-p tungaanut 645-nut amerleriarput. Tassanngaanniillu amerlilaartarlutillu ikilisarlutillu nikerarput, 2015-imi 449-t aamma 2016-imi 360-t. Meeqqat qallunaanik angajoqqaallit Kalaallit Nunaanni inunngortut, immaqa sivikitsuinnarmik tamaaniissimasut uani kisitsinermi ilaanerat maluginiarneqassaaq. Kisianni inersimasuinnaat isigigaanni, aallarlutik nuuttartut angerlarlutik tikittartunit ikinnerupput.

Allatut oqaatigalugu ineriartorneq ingerlaannassappat, Kalaallit Nunaat kigaatsumik kalaaleerukkaluttuinnassaaq.

Robert Holmenep allagaani oqaaseqartut ilinniarnermut periarfissanut, meeqqat periarfissaqarnerunerinut, soraarninngornermi atukkanut, kammalaatersornermut, amigartumik isiginninnermut aamma politikkikkut tunngasunik kamaateqarnermut nassuiaataat tunngapput. Amerlanertigut taakku katinneri pissutaatinneqarlutik.

Sammisaq arlalinnik arlaaseralugu ukkatarivarput.

Sooq nuunnerlutit/nuukkusunnerlutit isumaliornerlutit/nuukkusunnginnerlutik oqaluttuarusukkuit allagit: walter@sermitsiaq.ag.

Powered by Labrador CMS