Nuummi tusarnaartitsineq
Nuuteeraq tusaamasaq marloriarluni tusarnaartitsinermik nalliuttorsiutigineqalertoq
Nunatsinni nipilersortartuni ataqqineqarnerpaat ilaat Nuummi tallimanngornermi tusarnaartitsissaaaq
Ole Kristiansenip nuuteeraq 'Pop Uummataaruffimmi' ukiut 25-t matuma siorna saqqummersippaa.
Maanna nipilersortunilu nuuteeqqap nalliuttorsiutigineqarnerani tusarnaartitsinissaminnut piareerput, tamannalu unnugu tallimanngornermi Nuummi kulturip illorsuani Katuami pissaaq.
Taamaattumillu nuannarineqarluartut 'Nutaraq Kaassassummut', 'Apereqqaassuinga' aamma 'Pop Uummataaruffimmi' tusarnaarnissaannut periarfissaqarpoq.
Atuaruk: Ataqqinaammik nersornaat Ole Kristiansenimut
Nipilersortartoq ataqqineqartoq
Nipilersortartoq Aasianneersoq 2009-mi Kodami ataqqinaammik nersornaaserneqarpoq. Ole Kristiansen nunatta nipilersornikkut oqaluttuarisaanerani nipilersullaqqinnerpaat, taalliullaqqinnerpaat aammalu ataqqineqarnerpaat ilagaat.
Taalliai immikkuullarissut erinallu ullutsinnut tulluussartuartut ukiorpassuarni tamalaanit nuannarineqartuarsimapput.
Tusarnaartitsisoqalerpat nipilersortuussapput Ole Kristiansen, Nuka Absalonsen, Eigil Petersen, Julius Larsen aammalu Joorsi Sørensen.
Inuusuttut kissassaasuussapput
Roclertartut Rockstones Ilannguaq M. Kristiansen siuttoralugu Katuami tusarnaartitsineq aallartissavaat.
Taakku nipilersoriaasaat rockiuvoq, sakkukinnerumaaniit rockit sakkortuut atortarpaat.