mittarfik
Nuup mittarfittaassaa: Sermersuup piareersaaneq aallartippaa
Illoqarfiit pingaarnersaanni mittarfiup tallineqarnissaanik Namminersorlutik Oqartussat kissaataat kommunalbestyrelsip ilalerpaa
– Naminersorlutik Oqartussat Nuummi mittarfiup tallineqarnissaanik kissaataa Kommuneqarfik Sermersuup ilalerpaa sananeqarnissaalu qulakkeerniarlugu.
Taamaattumik kommunalbestyrelsip sumiiffimmut kommunimut pilersaarummut ilassut akuersissutigaa, taamaasilluni mittarfiu eqqaa naleqqussarneqarsinnaalissalluni, Kommuneqarfik Sermersooq paasissutissiivoq.
Mittarfik ullumikkut 950 meterinik takissuseqarpoq, taamaattumillu timmisartunit mikinernit taamaalaat miffigineqarsinnaalluni. Mittarfik 2.200 meterinut tallineqarpat Nuummi mittarfik timmisartunit anginerusunit atlantikoortaatinillu miffigineqarsinnaalissaaq.
Sinaakkutassat pitsaanerusut
– Mittarfissaq qilanaaraarput, taannami Nuup ineriartuinnarnissaanut pingaaruteqarpoq. Kommunimut pilersaarutip ilassutaatigut ammaanneqarpoq tamassuma peqatigiilluta ineriartortinnissaanut, ilaatigut inuussutissarsiortunut nunaminernik nutaanik peqartillugu. Mittarfik ingerlalluartoq nunap iluanut avammullu attaveqarfiusoq inuussutissarsiutit attatiinnarnissaannut ingerlalluartumillu ineriartortinnissaannut pingaaruteqartorujussuuvoq, Ado Holm (IA) Sanaartornermut Avatangiisinullu Ataatsimiititaliap siulittaasua oqarpoq.
Sumiiffiit amerlanerit
Naatsorsuutigineqarpoq mittarfik 2.200 meterinik takissuseqassasoq, mittarfeqarfimmiissappullu illut terminaleqarfiit, biilinik inissiisarfiit, tuniniaaviirt kiisalu inuussutissarsiuteqarfiit. Mittarfiup 950 meteriniit 2.200 meterinut tallineqarnissaanut pisariaqarpoq qaartiterinissaq nunaminernillu manissaanissat.
Pitsaassuseq
Kommuneqarfik Sermersuup sanaartukkap sananeqaatikkut pitsaassusissaa tamakkiisumillu ataatsimoortumik isikkoqartinneqarnissaa samminiarpaa, aallaqqaataaniit takujuminartuunissaa aammalu sumiiffimminik illoqarfimmullu sunniutissai eqqarsaatigalugit.