aput sisoorsinnaasoq
Nuup eqqaani aput sisooratarsinnaasoq
Apingaatsiarnikuunera aputip sisoraatarsinnaaneranut ulorianartorsiortitsivoq, ukiut marluk matuma siorna soorlu taamatut pisoqarsimasoq.
Sapaatip-akunnerata tulliani aput sisoorteriarneqassasoq, Nuummi Sisorarfiit Facebookimi quppernerminni ilisimatitsissutigaat.
- Quassussuup avannaata tungaa Kuanninnguit qulaatungaani massakkut aputeqarsuaarpoq. Tassunaarnissinni mianersoqqussavatsigit. Ilimananngikkaluarpoq ingerlaannaq sisoriaannaanera. Kisianni sillimaniarneq pillugu kiatsippat sisuunnginnissaa pillugu sapaatip-akunnerata tulliani sisutinnissaa misilinneqassaaq, majuartaammi akisussaasut allapput.
Nalinginnaasumit aputeqarnerujussuaq
Ukiormanna nalinginnaanngitsumik apingaatsiarnikuuvoq, tamatumalu aputinik sisoortoqarnissaanut ulorianarnerulersippaat. Januaarip qaammataannaani qaammammut nalinginnaasumit tallimariaammik aput annertunerusoq nakkarpoq, DMI qaammammut sila pillugu nalunaarusiamini ilisimatitsinikuuvoq.
Inuit sumiiffimmi sapaatip-akunnerata tulliani angalaarusuttut Sisorarfiit Facebookimi quppernerat malinnaaffigissagaat kajumissaarutigineqarpoq, tassani aputip sisoornissaanut ulorianartorsiorneq annikillisarneqalerpat nalunaaruteqartoqassaaq.