Nuuk

Nuup Bussii: Aqqusinikkut angallannermi mianersoqatigiitta

Nuummi aqqusinermi ajutoortoqarnerani ajornerusumik susoqarsimanngitsoq Nuup Bussiinit oqiliallaatigineqarpoq

Aqqusinermi angallannermi bussi ajutoortoq ajutoorfimmit pingasunngornerup unnukkuanit peersinneqarpoq. Bussini angallannerit nalinginnaasumik ingerlaqqilereerput

Aqqusinermi angallannermi Nuummi ajutoortoqarnerani bussini ilaasut ajutoortoqarsimatillugu saaffiginnittarfimmut pisariaqartitsisoqassappat suli saaffiginnissinnaasut Nuup Bussiinit nalunaarutigineqarpoq. Bussini ilaasut pingasut saaffiginnittarfimmik pisariaqartitsisut sullinneqarput pingasunngormat, ataaserlu sisamanngornermi nalunaarluni.

Bussi ajutoortoq angalaqqikkallarnavianngitsoq oqaatigineqarpoq. Nuup Bussiili ataatsimik immikkut bussimik sisamanngornermi angalatitsipput.

Mianersornissaq
- Pisarnitsitut angalasarnigut ingerlatiinnassavagut. Neriuutigaarput siunissami ajutoortoqaqqissanngitsoq, Nuup Bussiini pisortaaneq Michael Driefer Sermitsiaq.AG-mut oqarpoq.

Ajutoorneq angallaffiulertornerup nalaani pivoq nalunaaqutaq 16.00-riitsiartoq. Bussi ajutoortoq ilaasoqangaatsiarluni ajutoorpoq.

- Tarnip pissusaanik ilisimasalimmik Sana-mi oqaloqatiginnittoqarsinnaanera ingerlaannaq neqeroorutigaarput. Periarfissaq inuit sisamat tiguaat, ataaserlu aamma sisamanngornermi atigullugu. Oqaatigerusupparput bussimi ajutoortumi ilaasut suli saaffiginninnissamut periarfissaq ammatikkatsigu, taamaaliortoqarusuppallu uagutsinnut saaffiginniinnassapput, Michael Driefer oqarpoq.

Aquttoq tupaqqaqisoq
Bussimi aquttoq ajutooreernermi kingunitsianngua Sana-liaanneqarpoq, tassanilu ikiorserneqarluni.

- Bussini aquttoq paasinarluartumik tupaqqasorujussuuvoq. Qujanartumik ullumikkut pitsaaneruvoq, sulilu eqqissisimaartinneqarallarluni. Qujaqaagut ilaasutsinni ajornerusumik pisoqarsimanngimmat. Tamatumunnga tunngatillugu aamma nalunaarutigerusupparput aqqusinermi angallannermi kikkut tamaasa mianersortarnissaat kaammattuutigigatsigu, Michael Driefer oqarpoq.

Aqqusinermi angallannermi ajutoorneq politiinit suli misissorneqarpoq.

Powered by Labrador CMS