Sangusaarneq
Nuunu Italiami ajugaasut sisamaattut kusanartumik angusaqarpoq
Kalaaleq sangusaartartoq Italiami unammiaarnermi angusarissaarluarpoq
Sangusaartartoq 20-nik ukiulik Nuunu Chemnitz Berthelsen Nuummeersoq sapaatiummat Monte Croce Comeliocomi Italiami unnamminermi angusarissaarpoq.
Unammeriaatsimi slalomimi taanna juniorit akornanni ajugaasut sisamaattut inissippoq, unamminermi ajugaasumit sekundimik ataasiinnarmik kigaannerulluni.
- Unamminermi arlalinnik kukkugaluarpunga, kisianni iluatsippara, angusaralu naammagisimaartorujussuuara, Sermitsiaq.AG-mut oqarpoq.
Atuaruk: Sangusaartartoq aappassaa VM-imut peqataalersoq
Unammiuaarnerni arlalinni peqataaniartoq
Siullermeerlunilu 60 FIS-pointit ataallugit taanna angusaqarpoq. Tassami unamminermi 53 FIS-pointinnappoq.
- Angusama kingunerisaanik maanna pikkorivissutut tapiiffigineqarsinnaalerpunga, tamannalu naammagisimaaqaara, Nuunu Chemnitz Berthelsen oqarpoq.
Taanna unammiartoqqilluni Sloveniamukassaaq, tamatuma kingorna aamma Østrigimi unamminissamut peqataassaaq.
Qaammatip tulliani Scweizimi nunarsuarmi pissartanngorniunnermut peqataassaaq.
Atuaruk: Nuunu siuariarujussuartoq