Sangusaarneq
Nuunu Chemnitz Berthelsen Japanimi FIS-erluni ajugaasoq
Sangusaartartoq nunani tamalaani sisorartartut kattuffiata ataani unamminermi ajugaavoq.
Nuunu Chemnitz Berthelsen Shigakohogenimi Japanimi FIS-imi unamminermi ajugaavoq.
Sisunerni marlunni piffissaq katillugu 1:29.23 minutsit atorpai. Tamanna 0.04-mik Fuki Shikunimit Japanimeersumit sukkaneruvoq.
FIS-erluni unamminerit nunat tamalaat sisorartartut kattuffiannit aaqqissuussaasarput.
Nuunu Chemnitz Berthelsenip OL-imut peqataanissani neriuutigisimagaluarpaa. Naak nunat tamalaat piumasaqaataat naammassigaluarlugit, Dansk Idrætsforbundip piumasaqaatai naammassinngilai. Maanna kisianni Japanimi iluatsitsivoq.
- Nuunu Chemnitz Berthelsen sangusaartartoq, ukiormanna ingerlalluartorujussuuvoq, Dansk Skiforbund Facebookimi quppernermini allappoq.
- Japanimi Shigakohogenimi FIS-erluni unamminermi maanna ajugaavoq. Nuunu Koreami aamma Japanimi sisulluaqattaarnikuuvoq.
- Nuunu sangusaartartuuvoq, maannalu qaffariarluni 40 FIS point ataallugit inissisimalerpoq, tamatumalu kinguneraa nunarsuarmi sangusaartartuni pitsaanerit 500-t akornanniilerpoq.