Nuuk
Nuummiut stafet suiallagilerpaat
Sisamanngornermut silassaq pitsaanngilaq taamaattoq nunatsinni timigissaatigalugu arpannerit annersaat DHL-stafet Nuummi pisussaavoq
DHL-stafettimik aaqqissuisut Tele-Postimeersut saammarsaatigaat arpannerup nalaani peqataasut piffissap annersaa isersimasinnaammata arpanneq sisamanngornermi nalunaaqutaq tallimaniit pilerpat. Taamaammat arpanneq ingerlanneqassaaq naak DMI-mi silassamik ilimasaarut malillugu sisamanngornermi Nuummi 25 m/s angullugu anorlertussaagaluartoq ullup naalernerani sakkukillilaartussamik.
DHL-stafet ukiormanna assut pissamaarfiugaluarpoq peqataasut aatsaat taama amerlatigalutik arpaqataasut 800-uusussammata. Iligiit peqataasinnaasut 125-nut killilerneqaraluarput. Taamaattoq nalunaartut takkussuinavipput. Taamaattumik aaqqissuisut aalajangerput iligiit peqataasut 160-nngortinniarlugit. Maannali peqataasussat anorisiorlutillu masangaatsiarnissaat ilimanarpoq, silassaq malillugu siallerlunilu anorlertussaammat.
Anori sialullu aggerput
- Taamaakkaluartoq stafet-ip ingerlanneqarnissaa aalajangiusimaannarparput, neriuppugullu arpattussat sila akornutigissanngikkaat. Qujanartumimmi piffissap ilarujussuani Inussiviup iluaniittussaavugut, Tele-Post nalunaarpoq.
Iligiit peqataasut tallimakkaassapput peqataasut immikkut 5 kilometerit arpassallutik.
Sangusaartartut peqatigiiffiat NS-84 arpannermik aaqqissueqataavoq namminerlu piumassutsimik ikiuuttut arpaffimmi nikorfassapput isumannaatsumik arpattoqarnissaa qulakkeerniarlugu.