arsaanneq
Nuummiut franskit tusaamasat ajorsartippaat
Nuummi utoqqasaat immikkut toqqakkat aamma Variétés Club de France ikinngutigiittut unammipput ilaatigut sakkortuuliorfiullattaasumik
Rasmus Johansen ajugaatitsisuuvoq Nuummi utoqqasaat immikkut toqqakkat Frankrigimeersunut Variétés Club de Francemeersunut 1-0-mik ajugaammata. Unammineq sioqqullugu Qaqortumeersoq Jens Fisker qilaatersorpoq inuttaata oqarneratut franskinut ikinngutigiittut unamminermi ajorsartitseriassutaasumik inngerluni.
Nuup arsaaffiani kingumut pingasunngornermi unnukkut inuppassuaqarpoq. Arsaaffimmi atugassarisaasut ataasinngornermi unamminermut sanilliullugit pitsaanerulersimanngillat arsaaffimmi marsarloqaqisumi arsap ingerlanera naatsorsoruminaatsinneqaqaluni.
Unammisut tamarmik unammineq sioqqullugu inuiattut erinarsuumminnik erinarsorput qilaatersortartorlu Jens Fisker marloriarluni inngerluni.
Mianersoqqussutit arlallit
- Franskit ajorsarteriaraluarniarpakka, katuarluni aallartinngilaarnermini oqarpoq, tulleriisiinnarlugulu marloriarluni inngerluni.
Utoqqasaat Nuummeersut Variétés Club de Francep arsaaffianut peqqatuttarput franskillu arlaleriarlutik isertitsingajattarlutik. Målmandi misilittagartooq John Kreutzmann annaassillualaavippoq franskit isertitseriarnerisa ulorianarnersarigunagaat Robert Piresip talerpimminik aqillugu inissilluagaa asserlualaavikkamiuk.
Unamminerup ilaa ikinngutigiittut unammisut imminnut inussiarnisaarfigivallaarneq ajorput tuit atorlugit sarmitsaannermi arsaaffimmut ilaatigut marullummut eqqaanarsinnaasumut orlutitsisoqartarluni.
Mumereernermi franskit Nuummiut arsarfianniiginnangajapput arsarli kalaallit ajuuffiinut apuukkumanngivippoq. Unammineq naajartulersoq Rasmus Johansen ungasianiit arpatassiissutaasumik tunineqarpoq. Romarin Billong siornatigut Cameroun sinnerlugu unammisartuusimasoq arsamut siulliuniuteqatigaa. Sarminnermi Rasmus Johansen nikorfaarinneruvoq taamalu arsaq isertillugu målmand taseraaluillu avaqqullugit. Unamminermi dommeriusoq Daniel Jakobsen mianersoqqussutinik arlalinnik iligiinnut tamaginnut nittaareerluni unammineq naammassisoq nalunaarlugu siggarpoq
Franskit Europamut sisamanngornermi aallassapput Reykjavik aqqusaarlugu.
Unamminermit assit qanittumi Sermitsiaq.AG-mi saqqummissapput.