aallartisaaneq
Nuummi uumasuusiveeraliorusuttoq
Nuummi uumasuusiveeqqamik sanasaruttoq 5000 koruuninnappoq
Angutimmarik Hansen, Nuummi uumasuusiveeqqamik sanasaruttoq, sapaammi 5000 koruuninnappoq suliffeqarfinnik nutaanik ineriartortitsinissaq pillugu pikkorissaasoqarmat ‘Startup Greenland’-imik taaguuteqartumik.
Angutimmarik Hansen suliniutissatut pilersaarutit arfinillit saqqummiunneqartut, tassaasut angallammi neriniartarfik, arnanut internettikkut atuagassiaq nutaaq, kræftimik nappaateqartunut nunarsuaq tamakkerlugu internettikkut naapittarfik, supoortitsilluni biilinut aputaajaallunilu sermiiaat, skater-parki kiisalu ajugaassutaasoq uumaasuusiveeraq ‘mini-zoo’ sinnerlugit ajugaavoq.
- Nersorinnissutip pissarsiarinera tulluusimaarutigisorujussuuara. Isumassarsiamalu piviusunngortinnissaa siunertaralugu Startupimi pilersaarusiorlugu ineriartortitara ingerlateqqissavara, suliniuteqartuusoq Angutimmarik Hansen oqarpoq.
Startup ukiut appaassaat Greenland Businessimit ingerlanneqarpoq, Kalaallit Nunaanni illoqarfinni tamani nutaamik eqqarsarluni suliffeqarfinnik suliffissanillu nutaanik isumassarsianik ineriartortitsinissamik kaammattuutaasoq.
- Uumasuusiveeqqamik pilersaarusiaq Greenland Businessip ineriartortitsinermik kissaateqarneranut naapertuuppoq, tassa nutaaliorusussuseqarluni aamma inooqataanermut, ilinniartitaanermut takornarialerinermullu attuumassutilimmik ineriartortitsisinnaassuseqarluni inuussutissarsiummik nutaamik pilersitsinissamik kissaateqarneq, Hans Peter Poulsen, Greenland Businessimeersoq Sara Heilmann peqatigalugu, sapaatip akunnerata naanerani itisiliilluni saammisaqartitsinermi aqutsisoq oqarpoq.