Nuuk

Nuummi uumasunut nakorsaqaleqqissaaq

Kommuneqarfik Sermersooq uumasut atugarissaarnissaannut tapiissuteqarpoq

Uumasunut nakorsanngortussaq sapaatip akunneranut ikinnerpaamik pingasoriarluni uumasunik nakorsiaassivigineqartassaaq, pinartoqartillugulu saaffigineqarnissaminut piareersimasassalluni

Uumasunut nakorsanngortussaq sapaatip akunneranut ikinnerpaamik pingasoriarluni uumasunik nakorsiaassivigineqartassaaq, pinartoqartillugulu saaffigineqarnissaminut piareersimasassalluni.

Kommuneqarfik Sermersooq 150.000 koruuninik uumasunut nakorsiartarfimmut tapiissutissatut aningaasaliissuteqarpoq.

Sanaartornermut Avatangiisinullu Ataatsimiititaq uumasunut nakorsiartarfimmut inip attartorneranu akiliutissamik tapiissuteqarpoq. Uumasunut nakorsiaassisarfissaq iluarsaanneqaleruttorpoq

Kommunimi innuttaasuut Nuup avataani najugaqartut oqarasuaatikkut internettikkulluunniit saaffiginninnissaminnut periarfissaqassapput.

Kiisami iluatsippoq
- Nuummi uumasunut nakorsaqannginnera Nuummi innuttaasunit piffissami sivitsortumi ajornartorsiutigineqarpoq. Aningaasaliissuteqarnitsigut matumuuna kommunitsinni uumasunut nakorsamik amigaateqarnerput aaqqiissuteqaqataaffigisinnaallugu neriuutigaarput, Kommuneqarfik Sermersuumi Sanarfinermut Avatangiisinullu ataatsimiititami siulittaasoq Mille Søvndahl Pedersen oqarpoq.

Peqatigiiffik Nuummi Uumasut Nuummi uumasunik nakorsaqannginnera nuannaarutigaat, illoqarfimmimi 2010-mili uumasunik nakorsaqanngimmat. Kingullermik uumasunut nakorsaasoq Pia Cordt Olsen 2010-mi unippoq.

- Maannamut tapersersorneqarnerput nuannaarutigisorujussuuarput. Kommunitsinni uumasunut nakorsaqalernissaq piviusunngortinniarlugu piumassutsiminnik suleqataasut tamaviaarput. Anguniagarput angulerparput. Nuannerluinnarpoq aallartisarnitsinni nakorsiartarfimmik tamakkiisumik atortulersukkamik pissarsisinnaasimagatta, uumasunut nakorsanik oqaloqatiginninnissamik isumaqatigiissuteqarluta inissiamullu akiliunneqarluta. Pissanganartorujussuuvoq, peqatigiiffik Nuummi Uumasut sinnerlugit Kommuneqarfik Sermersooq, tapersersortivut suleqatigisartakkavullu qutsavigerusuppakka, Tom Amtoft, peqatigiiffimmi siulittaasoq nuannaaqisoq unnersiorpoq.

Powered by Labrador CMS