utoqqaat
Nuummi utoqqalinersiallit amerlipiloortut
Qanga Kalaallit Nunaat taaneqartarsimavoq »Inuusuttut Nunaat«. Tassa 1970-ikkunni. Tamannali qaangiutereerpoq. Kalaallit inuunertusigaluttuinnarput, kommunillu aaqqiissutissanik nutaanik nassaarniartariaqarput
Ukiut inuuffiusut amerliartornerat pissusissamisoortumik pitsaasuuvoq. Amerlanerusut sivisuumik inuuneqartalermata. Tamannali aamma inuiaqatigiinnut akisoqaaq.
Qeqqata Kommunia unammillerfiusoq
AG-p sapaatip akunnerani kingullermi allaaseraa Qeqqata Kommuniani utoqqaat illuinut utaqqisut amerliartupiloornerat kommunimut qanoq unammillernartigisoq. Sisimiuni utoqqaat illuannut Qupanummuinnaq inissaminnik utaqqisut 32-upput. Maniitsumilu 15-iullutik.
Qeqqata Kommuniani politikerit isumaqarput angerlarsimaffimmi ulloq unnuarlu ikiorteqarneq aaqqiissutaasinnaasoq, tamanna nutaamik utoqqarnut illuliornermit akikinnerujussuummat. Taamaattumik kommuni suliniummut aallarniutaasussamut pilersaarummik Naalakkersuisunut saaffiginnissuteqarsimavoq; tamannalu peqatigalugu kommunip inassutigalugu kommunit allat taamaasioqqullugit.
Periuserli tamanna Kommuneqarfik Sermersuumi isumaliutigineqareerpoq, tassani utoqqaat Qeqqata Kommunianit amerliartupiloornerummata. Ineriartorneq tamanna kisitsisinik takussutissalerlugu kommunalbestyrelsip Tungiuinermut ataatsimiititaliaata qanittukkut saqqummiuppaa.
Nuummi amerleriaat annerusoq
- Inuiaqatigiit (innuttaasut, aaqqiss.) agguataarnerisa ineriartornerata takutippaa, Sermersuumi innuttaasut utoqqaat kommuninit allanit amerliartornerpaassasut. 2040-p tungaanut utoqqaat 65 aamma 99-it akornanni ukiullit 106,5 procentimik amerleriarsimassapput. Amerleriaataat Nuummi Tasiilamilu malunnarnersaassapput, takussutissiami Tungiuinermut ataatsimiititaliap suliarisimasaani takuneqarsinnaavoq.
Allaaserisaq AG aviisimi tamakkerlugu atuaruk, aviisi digitaliusoq uani pisiarisinnaavat: