nuanninnguarsi
Nuummi tivoli aallarteqqilerpoq
Nuummi tivoli nutaanik piginnittoqarluni aallarteqqilerpoq
Ukiormanna Nuummi tivoliarartoqassaaq aliikkusiarfillu 2015-mi tamakkiisumik ingerlanneqalersaarluni.
Taama pisoqartussanngorpoq Skt. Georgs Gildep tivolimut atortut Nuummi illorsuarmut timersortarfimmut Inussivimmullu tunimmagit.
Nuup arsaaffiata eqqaa aggustip naanerani 1981-miit 2009-mut tivolerfigineqartarsimavoq. Tassani Skt. Georgs Gildet issakatsiaafinnik, kaavittunik, seqquusartarfinnik, candyflossinik atortunillu allanik tivolimut tunngatinneqarsinnaasunik ikkussuisarsimavoq. Sinneqartoorutit Nunatsinni meeqqanut inuusuttunullu suliniarnernut ingerlateqqinneqartarsimapput. Aaqqissuussarli ima annertugilersimavoq nukiit amerlanerit pisariaqartinneqalersimallutik.
Timersortut pissarsissapput
- Aaqqissuussaq ima annertugilersimavoq uagut nukissaqarfigiunnaarsimallugu. Illoqarfimmi suleqatissarsiorsimagaluarpugut, tamannali iluatsissinnaasimanngilarput – siornalu arsaaffiup eqqaani Skt. Georgs Gildep illuutaa tunigatsigu isumaqatigiissutigisimavarput atortut aamma tunineqassasut illoqarfimmut nuannaarutaasinnaanissaat anguniarlugu, Skt. Geors Gildemi aqutsisoq Harry Holm oqarpoq.
Maanna Nuummi Illorsuup Timersortarfiup aamma Inussiviup ingerlanniarlugu aalajangerput pisinissamullu atsiorlutik. Sinneqartoorutit timersortartunut tuttalissapput.
- Nuannaarutigaarput Nuummi Illorsuaq Timersortarfik aamma Inussivik unammilligassamik ingerlatitseqqinniarmata ukiormannalu tivoliarartitsiniarlutik – taava tivoli tamakkiisoq 2015-mi ingerlanniarpaat. Qularutiginngilarput tivolip piginnittortaavisa suliassaq naammassisinnaagaat. Pilersaarutaavoq illoqarfimmi timersoqatigiiffiit akuutinneqarnissaat taamaasillutik sinneqartoorutinik pissarseqataasarniassammata, Harry Holm oqarpoq.