Nuummi tallimanngorneq 13-iat - sumik ajortussaqanngitsoq
Pisiniarfiup Nota Benep tallimanngormat unnukkut tallimanngornerup 13-iani ulloqartarnerani ajortunik pisoqartarneranik isummiussat tamaasa suujunnaarsinniarsarai nuannersumik pisoqartitsilluni
Isummiussarpassuaqarpoq tallimanngorneq qaammatip ulluisa 13-ianni pigaangat qanoq pisoqartarneranik. Nuup illoqarfiata qeqqani pisiniarfimmi Nota Bene-mi tamakku piuneerutsinniarneqarput Open By Night-imi aaqqissuussinermi tusarnaartitsillatsiarluni Nuummi eqqumiitsuliortunik nipilersortartunik.
Nalunaaqutaq 18 sulliulluni sassarpoq Hinnarik, unnupallaannginnerani meeqqat takuniassamassuk. Taanna pisumik aallartitsilluaqaaq ersaarttaanneqarluni erinarsoqatigineqartarlunilu. Allaat lucia erinarsoriaraluarpaa, kisimiillunili atugassaanngitsoq paasipallappaa.
Inuit nipilersortunit aliikkusersorneqarneranni æbleskivinik, kaffimik sodavandinillu pølsevognimit, pisussaq pissutigalugu tamaanga inissinneqarsimasumit, sassaallertoqarpoq. Tamakkuninnga agguaasuuvoq Note Bene-p piginnittua Michael Munch, taannalu tukkoqaluni agguaavoq.
Hinnariup kingorna Katsi Kleist nipilersortartuilu tusarnersumik appisimaarput. Tulliullutik marluusartut Frederik aamma Christian Elsner, Nanook-unni nipilersortartut, taakkulu nuannisartitsilluarput. Nina Kreutzmann Jørgensenip aamma Malik Høgelund Olsenip unnuk nuannerluinnartoq ussagaarneqarluartorlu naggaserlugu aliikkkusersuipput.