Nuummi suliffissaaleqisut ikileriangaatsiartut

Kommuneqarfiit pingaarnersaanni januarip qaammataani suliffissaaleqisut 1.434-iusimapput kisitsillu taanna 451-inik ikileriaateqarfiuvoq taamaasillutik suliffissaaleqisut oktoberip qaammataani 1000-it ataanniilersimallutik – eqqornerusumik oqaatigissagaanni 983-iullutik.

Procentimik appariaateqarujussuarneq

Suliffissaaleqisut procentinngornerini 8,7 procentimiit 5,9 procentimut appariaateqarsimapput. 2016-imi agguaqatigiisillugu katinnerini 7.8 pocentiusimavoq.

Kisitsisit suliffissaaqisut ataatsimut isigalugu takussutissiat, Isumaginninnermut Suliffeqarnermullu Ingerlatsivimmiik Isumaginninnermut Suliffeqarnermullu Ataatsimiititamut, tallimanngorpat 24. novemberi ataatsimiittussamut nassiunneqarsimasumi, allassimavoq.

Suliffissaaleqisut procentinngorneri illoqarfimmiit illoqarfimmut assigiinngissutaarput. Nalunaaruteqarnermilu sulisinnaasut amerlaneruleraluartut suliffissaaleqisut ikileriaateqarsimanerat, maluginiaqquneqarpoq.

- Oktobarimi 2016-imut naleqqiullugu oktobarimi 2017-mi Nuummi nunaqarfiinilu innuttaasut sulisinnaasut 157-inik amerleriarsimagaluartut, taamaattoq suliffissaaleqisut 1,3 %-inik ikileriarsimapput, tassami 4,8 %-iniit 3,5 %-inut ikileriarsimagamik, ataatsimiititap ullormut oqaluserisassaani allassimavoq.

Aningaasaqarnermut sunniutit

Kisitsisit kommunip aningaasaqarneranut sunniuteqangaatsiassapput. Taamaattoq sipaarniarfiusinnaasut kisitsisilerneqarsimanngillat.

”Kommuneqarfik Sermersuumi suliffissarsiortut ikileriarnerat pisortanit aammalu suliffeqanngikkallarnermi ikiorsiissutinut aningaasartuutit toqqaannartumik annikilleriarnerannik kinguneqarpoq. Taamatuttaaq suliffissaaleqisut ikileriarnerat kommunimi isumaginninnikkut aningaasartuutit ikileriarnerannik naatsorsuutigisatut ippoq, ingerlatsivimmi, ulluinnarni pisortaangerungallartumit Kista Lynge Høeghimit aqunneqartoq, politikerit nalunaarutaanni allassimavoq.