suliffissat
Nuummi suliffiit nutaat 40-t
Uuliasiornermi aatsitassarsiornermilu »ilisimasanut centerimi« nutaami ilisimatuunik atorfinitsitsinissamut 10 millioner koruuninik aningaasaliisoqassaaq
Suliffissaaleqisut amerliartuleruttorneranni Nuummut nutaarsiassaqarpoq nuannersumik.
Naalakkersuisut Nuummi nunami ujarassiornermik misissuisoqarfimmik pilersitsiniarput. Taanna suliffinnik nutaanik 40-nik kinguneqassaaq.
Taakkunannga 20-it ilinniagartuujussapput.
Pilersaarutit malillugit pisoqassappat GeoSuvey Greenland (GSG) 2016-imi illumi nutaami atulersinnaassaaq, neriuutigineqarporlu ilaatigut aningaasaateqarfiit aningaasaataannik aningaasalerneqassasoq. Soorlu Pinngortitaleriffimik pilersinneqarmat taamaattoqarsimasoq.
Tusarniaanermi, Aatsitassanut Naalakkersuisoqarfiup aasaq manna tamanut ammasumik ingerlataani, paasissutissat malillugit GeoSurvey Greenland ingerlatsinermut ukiumut 40 millioner koruuninik aningaasaliiffigineqarnissaminut pisariaqartitsissaaq. Tamatuma saniatigut suliniummut aningaasaliissutigineqassapput 11,5 millioner koruunit.
Missingersuutaagallartut naapertorlugit taakkunannga 10 millioner koruunit sulisut 40-t akissarsiaqartinnerannut atorneqartassapput. Taamaasilluni centeri aamma kommunip karsianut ajornartorsiortumut, akileraarutitigut isertitsiffiusalissaaq.
Aningaasarpassuit
Tusarniaanermi paasissutissat malillugit GeoSurvey Greenlandimik siunertaavoq qulakkiissallugu »nunap aatsitassanik, uuliamik, gas-imik imermillu pisuussutaanik ingerlatsinerup qarasaasiatigut paasissutissanik ilisimatusarnermik tunngavilinnik ataqatigiissunik ingerlanneqarnissaa«.
Tamatuma saniatigut webportal-imik ineriartortitsisoqassaaq, tassuunalu ingerlatsiviup ilisimasanik katersai tamanut siammarsarneqartassapput. Tamatumunnga atatillugu laboratoriaqassaaq qillikkanillu misissugassanik toqqortaasiveqassalluni.
Aatsitassanut Naalakkersuisoqarfiup allanneratut Kalaallit Nunaata ujarassiornikkut periarfissaanik »aningaasaliinissamut pilerinartumik« takutitsinerup saniatigut GeoSurgey Greenland oqartussaasunut, ilinniagaqarfinnut, ingerlatsivinnut namminersortunullu paasissutissanik ilisimasanillu pilersuissaaq, paasissutissiisarnikkut ussassaaruteqarnikkullu, aningaasarsiornermik tunngavilimmik.
Centerip ingerlanneqarnera ilaatigut atuisartunit akilerneqassaaq, ilaatigut aatsitassarsiornermik ingerlatsivissuarnit. Tassa ingerlatsivik isertitatigut ingerlanneqartutut taaneqartartoq.