misissueqqissaarneq
Nuummi suliffeqarfiit siuariarnissamik naatsorsuuteqarput
Illoqarfiit pingaarnersaanni suliffeqarfiit 2018-imi siuariarnissamik naatsorsuuteqarput. Sermersooq Business Councilip Nuummi suliffeqarfiit ilaannik inuussutissarsiornermik misissueqqissaarnermi tamanna atuarneqarsinnaavoq.
Misissueqqissaarneq taanna siulliuvoq, inernerillu ippassaq tusagassiortunik katersortitsinermik saqqummiunneqarput.
- Ullumikkut misissueqqissaarnernik nutartikkanik, suliffeqarfiit siunissamut naatsorsuutigisaannik aammalu anigorniagassanik ajornakusoornerpaamik siunissami takkuttussatut ilimagisaannik, misissueqqissaarnermi tamanna allaqqavoq. Kiisalu suliffeqarfinni pisortaatitat ilaatigut periusissaqarluni ineriartortitsinissamut ingerlatsinermullu tunngatillugu piffissartik qanoq atortarneraat, nassuiaasunik nassaassaqanngilaq.
Nutaarsiassaq pitsaasoq tassaavoq, suliffeqarfiit qaammatini 12-ni tulliuttuni siuariarnissamik naatsorsuuteqarnerat. Kisianni suliffeqarfinnut aamma iluaqutaanissaanut atukkat pitsaanngitsumik sunniuteqarlutillu aporfiusinnaasunik peqarpoq.
Ingammik sulisunik ilinniarsimasunik aamma sulisunik immikkut ilisimasalinnik amigaateqarnerup siuariarnissamik anguniagaqarnermut aseruisinnaapput.
- Pingaartumik illuliortiternermi aamma aalisarnermi sulisussaaleqineq misigineqartarpoq aammalu kingulliullugu taaneqartumut tunngatillugu aalisarnerup iluani atorfinitsinneqarnissaq pilerigineqartanngitsoq misigineqartarpoq, inerniliussat arlaqartut ilaat taama oqaasertaqarpoq.
Kisianni sulisussaqarniarneq kisimi ernumassutigineqanngilaq.
- Pisortani suliassanik suliarinninnerup arriinnerujussua siuariartortitsinermut akimmiffittut erseqqissarneqarpoq, inuussutissarsiornermut nunaminertanik pissarsisinnaaneq, imaluunniit pissarsisinnaannginneq, aamma anigorniagassaasoq paasineqarluni, kisianni inuussutissarsiutini aalajangersimanerusuni misigineqartarluni (illuliortiterneq, takornariartitsisarneq aamma aalisarneq), mississueqqissaarnermi tamanna atuarneqarsinnaavoq.
- Ineriartortitsinermut aporfiusartunut pissutaasoq ataasiinnaanngitsoq, kisianni pissutaasut arlallit ataatsimoorlutik ineriartortitsinermut aporfiusinnaasartut, ilanngullugit politikkikkut aalajaassuseqannginneq, ungasissumut pilersaarusiortannginneq aammalu piukkunnartumik sulisussaaleqineq, sisissuinermi inerniliissutigineqarpoq.
Avammut nioqquteqarnissamik takorluugaqarneq aamma oqaluuserisassat pingaarnersaattut inissisimanngitsoq misissuinerup takutippaa, akerlianik Nuup avataani alliliinissamut soqutiginnittoqarneruvoq.
Pisortaatitat periusissanik aallussillutik isumaqarput, kisianni ''pisortat piffissaminnik qanoq atuisarnersut erseqqinnerusumik misissuinermi inerniliissutigineqarpoq, aallussineq maannakkorpiaq ajornartorsiutiniinnerusoq aammalu ineriartortitsineq periusissallu annikinnerutinneqartut.''