Nakkutilliinermik nalunaarsuineq
Nuummi Siumut: Asii akisussaaffimmik tigusisariaqartoq
Siumup Nuummi immikkoortortaqarfianinngaanniik Vittus Qujaukitsup siuttoralugu Kommuneqarfik Sermersuumi amerlanerussuteqartunut sakkortuumik isornartorsiuvipput. - Meeqqat sumiginnakkat suliarineqarnerani kommunalpolitikerit isiginnaanginnarsimapput, ilaatigut taama isornartorsiuisoqarpoq.
- Kommuneqarfik Sermersuumi borgmesteri, Asii Chemnitz Narup (IA) soorunami kommunimi meeqqat suminginnarneqarsimanerannut akisussaasuuvoq.
Siumup Nuummi immikkoortortaqarfia Kommuneqarfik Sermersuumi amerlanerussuteqarlutik kommunalbestyrelsimut kommunimi meeqqat suminginnakkat suliat pillugit isornartorsiuilluni taama allappoq.
Nakkutilliinermi nalunaarusiami uppernarsarneqarpoq suliamut aningaasat ukiut tallimat iluani immikkut 90 mio koruuninik meeqqat angerlarsimaffiup avataanut inissinneqarsimasunut aningaasaliissutigineqarsimasut. Taamaattoq isumaqaginnittoqarfimmit suliat suliarineqarnerini inatsisitigut naammassinnaasimanngilaq.
Ammasumik ingerlatsisoqarnissaanikm piumasaqarneq
Tamanna pissutigalugu Siumut Nuummi politikkikkut aqutsisunik akisussaaffimmik tigusisinaasunik ujartuivoq.
- Suliami aamma takutinneqarpoq ammasumik ingerlatsisoqarnissaa pisariaqarluinnartoq, taamaasilluni suliat taamaattut kinguarsarneqaratillu toqqorterneqannginniassammata, Siumut Nuummi Vittus Qujaukitsoq siuttoralugu tusagassiuutinut taama nalunaaruteqarput.
Atuaruk: Meeqqat inuunermik ulorianartorsiortillugit sumiginnakkat
Siumut Nuuk: Asii, akisussaaffik tigujuk
- Suliap tusaatissatut tiguneqarnera naammanngillaq, tassami suliami akisussaaffik inissinneqartariaqarpoq. Taamaattumik borgmesterip akisussaasseqartumik pissusilersornissaa pissusissamisuussagaluarpoq, Siumut Nuummi erseqqissaavoq.
Ingerlatsiviit amerlanerulernerat imaluunniit ulloq unnuarlu paaqqutarinniffiit aaqqiissutaanngitsut, Siumup immikkoortortaqarfia isumaqarpoq.
- Ilaqutariinnut paarisaqartartunut amerlanerusunik aningaasaliineq kisimi meeqqanut sumiginnagaareersunut iluaqusiisinnaavoq. Maluginiarparput Siumup kommunimi gruppia ajornartorsiutaasut aaqqiiviginiarlugit pitsaasumik suleqataaniarluni sassarsimammat. Taamatut suleqatiginnikkusussuseqarluni ingerlaneq tamakkiisumik taperserparput, Siumut Nuuk taama nalunaaruteqarpoq.