Nuuk
Nuummi silami qasujaallisarnermut atortut
Qasujaallisarnermut atortut nutaat ukioq naallugu silamiittartussatut ilusilersukkat innuttaasut allatut aalasarnissaannut periarfissiissapput
Maskiinamik iputtarissamik imaluunniit ataasiarluni nukkassarneq illup iluaniittariaarupput.
Tassami ulluni makkunani Nuuk silami qasujaallisarfittaarpoq. Atuarfik Samuel Kleinschmidtip eqqaani Qapiarfiusaami ataaseq aamma Eqalugalinnguit Akunnerillu akornanni sammisassaqartitsivimmut ilassutitut ataaseq.
Ukioq naallugu
Qasujaallisarnermut atortut nutaat ukioq naallugu silamiittartussatut ilusilersukkat innuttaasut allatut aalasarnissaannut periarfissiissapput.
- Innuttaasut akeqanngitsumik qasujaallisarnissaannik periarfissikkusuppavut. Qasujaallisarnermut atortut nutaat inunnik ullumikkut aalanatik qasujaallisarnermut ajortut aalatitsisalerumaartut aamma silami qasujaallisarfiit ataatsimoorussat sumi tamaani pilersinneqarumaartut neriuppugut, Kommuneqarfik Sermersuumi Meeqqanut, Ilaqutariinnut Atuarfeqarnermullu Ataatsimiititami siulittaasoq, Poul Hansen (D), oqarpoq.
Atuaruk: Nuummi arsaattarfiit ivigaaraasallit sisamat atoqqaartinneqartut
Ilassutit
Tamanna ilutigalugu qasujaallisartarfiit illoqarfimmi ivigaasaaqqanik arsaattarfinnut nuannarineqaqisunut ilassutitut isigineqassapput.
- Inuusuttorpassuit arsaanermik soqutigisaqanngillat. Taakku soorunami anillutik illoqarfiup illoqannginnersaanni aalanissaminnut periarfissaqartariaqarput, Poul Hansen oqarpoq.
ASK-ip eqqaani silami qasujaallisarfissaq siulleq ataasinngornermi juulip ulluisa 25-anni atorneqarnissaminut piareereersimassaaq. Aappaa Nuussuarmiittoq augustip allartinnerani naammassineqassaaq.
Sisorarfinni sulisut atortunik ilioraasuupput.