nipilersorneq

Nuummi rockfestivalit marluk nutaat

Piffissami aggersumi illoqarfiit pingaarnersaanni marlunnik rockfestivaleqassaaq.

Heca Nuuk A/S marloriarluni rockfestivalertitsinissaminut piareerpoq

Neriniartarfinnik imerniartarfinnillu ingerlatsivik, Heca Nuuk A/S, illoqarfiit pingaarnersaanni rockfestivalinik marlunnik aaqqissuussinissamut piareerpoq.

Rocfestivalertitsinissamut siorna katersuiniartoqarpoq. 150.000 koruunit katersorneqarnissaat anguniarneqarpoq.

Suliniummut tapersersuinerup annertunera pissutigalugu, marloriarluni rockfestivalertitsisoqassasoq, pisortaq Nicolai J. Nissen tusagassiuutinut nalunaarummi ilisimatitsivoq.

Rockfestivali siulleq ulloq ataatsip ingerlanerani pisussaq, februaarip 3-anni Inussivimmi pissaaq. Tassani Atsinnermiut, Tulleriit Kali peqatigalugu, Enok Poulsen Band aamma Naneruaq tusarnaartitsissapput.

- Festivalerneq annertooq illoqarfimmi nipilersortarfinni arlalinni aamma Inussivimmi pisussaq, tusarnaartitsinerup siulliup pineranit sapaatip-akunneri sisamat missaat qaangiuppata pissaaq, ullunilu arlalinni pissalluni, Nicolai J. Nissen oqarpoq.

Rockfestivalit marluk saniatigut Akisuanerit Festival ukiakkut ingerlanneqartarpoq.

Atuaruk: Nuummi rockfestivalertitsinissamut katersuiniarneq

Powered by Labrador CMS