Eqqissisimananngitsoq
Nuummi politiit: Tillinniarnerit malunnaatilimmik amerliartorput
Tillinniartoqannginnissaa anguniarlugu angerlarsimaffinni matut parnaarneqartarnissaat, igalaat matulluarneqartarnissaat kiisalu quit parnaarluarneqartarnissaat politiinit kaammattuipput
Nuummi politiit pisiniarfinni tillinniarsimasunik kiisalu angerlarsimaffinni tillinniartoqarsimaneranik amerlasuunik suliaqarput sapaatip akunnera kingullermi. Aqqusinermi angallannermi aamma unioqqutitsinerit amerlanerujussui maluginiarneqarpoq.
- Tillinniarnernut tunngasunik suliagut malunnaatilimmik sapaatit akunnerini siuliinit suliarineqartunit amerlanerupput. Pisiniarfinni arfineq marloriarluni tillinniartoqarpoq angerlarsimaffinnilu aqqaneq marlunni tillinniartoqarluni sapaatip akunnerani 46-mi. Suliarineqartut aqqanillit tassaapput tillinniarnerit, peqquserlunnerit ataasiakkaat aserorterinerillu, Nuummi politiinit Mikael B. Kofoed ilisimatitsivoq.
Tillinniartoqannginnissaa anguniarlugu angerlarsimaffinni matut parnaarneqartarnissaat, igalaat matulluarneqartarnissaat kiisalu quit parnaarluarneqartarnissaat politiinit kaammattuipput.
Politinit aamma aqqusinermi angallannermit nakkutilliipput. Biilertut amerlasuut oqarasuaammik angallattakkamik aqunnerminni oqalunnerat pissutaallutik unnerluutigineqarput, ilaallu aamma qitequteqannginnertik pissutigalugu unnerluutigineqarlutik, Mikael B. Kofoed oqarpoq.