politiit
Nuummi politiit annertuumik suliaqartut - assersuisoqarunnaarpoq
Politiit aallaasilisartut arlallit ippassaq unnukkut akunnerni arlalinni annertuumik suliaqarput, Qassuserfiullu tungaani aqqusinernik assersuipput. Assersuinerit maanna taamaatinneqareerput, ullaakkullu angallattut illoqarfimmi ingerlaarsinnaapput.
Nal. 05.40 nutartigaq
Politiit aallaasilerlutik, niaqoruserlutik aamma aallaasip imassaanik akimorneqarsinnaanngitsumik aaqanngitsulerlutik ataasinngornermi unnukkut Qassuserfiup tungaanukartinneqarput.
Politiit oqassaanngitsut
Taamatut suliaqarnermut qimminik aamma peqataaffigineqartumut suna pissutaanersoq, Nuummi politiit ippassaq unnukkut ullaaq mannalu 5.35-ip missaani ilisimatitsissutigerusunngilaat.
- Oqaasissaqanngilanga, politikommissær Pavia Kleist Sermitsiaq.AG-mut ataasinngornermi unnukkut taama oqarpoq. Taassuma kingusinnerusukku sumut tunngassuteqarnersoq oqaatiginiarpaa.
Politiit suliaqarnerat akunnerni arlalinni ingerlasimasoq, timmisartorlu tassani atorneqarunartoq sumiiffiup qulaani takuneqarsimasoq, pisup eqqaani ilisimannittoq ataasinngornermi 22.20-p missaani ilisimatitsissutigaa.
Politiit umiatsianut tulattarfiit eqqaanni aqqusinernik assersuipput, maannali peerneqareerput.
Kingusinnerusukkut paasissutissat
- Biilinik ingerlasut illoqarfimmi ingerlasinnaapput. Piffissami matumani assersuinngilagut, tamanna ilisimatitsissutigineqarpoq, politiit ullaakkut suliartortut aamma suliaqarnermi aqutsisut marlunngornermi ullaakkut suliartoreerpata innuttaasut paasisaqarnerujumaartut unnersuutigaat.