Sila uuminartoq
Nuummi nittaakkaluartoq: Assakaasunik taarsiinermut ullorititaq atuutsiinnarneqarpoq
Assakaasut naqqullit atorlugit ingerlasinnaaneq maajip 15-ani qaangiuppoq. Naak nittaakkaluaqisoq Sermersuumi politiit aamma kommunip ullorititaasoq atuutsiinnarpaat
Nuummi inuit aamma sinerissap ilarujussuani nittaalartorujussuusoq iterput, aqqusernillu aamma quatseqqissimasut.
Biilertartut amerlanersaasa assakaasut ukiorsiutit aasarsiutinik taarsereerunaraluarpaat, tassami Kommuneqarfik Sermersuumi naqqulinnik assakaasoqarluni ingerlasinnaanermut maajip 15-iat killeritinneqarmat.
Ullorititanik allanngueqqittoqanngilaq
Naak ataasinngornermi aqqusernit quatseqqissimagaluartut politiit aamma kommunip ullorititaasut atuutsiinnarpaat. Nuummi politiineersoq, Mikael Kofoed taama oqarpoq.
Taamaattorli biilillit assakaasuminnik suli taarsiinikuunngitsut ullumikkut politiinik unitsitaanavianngillat.
- Sila peqqutigalugu biilinik misissuinissaq nakkutilliinissarlu kinguartipparput, Mikael Kofoed oqaluttuarpoq.
Ukiuunera sivisooq
Kalaallit Nunaanni politiit aamma kommunit sisamaasut apriilip naanerani aalajangiuppaat assakaasunik taarsiinissamut ullorititaasut sivitsorneqassasut, ukiuuvallaarnera peqqutigalugu.
Naqqulinnik assakaasulinnik ingerlasinnaanermut sivitsuinerup ullui imaapput:
- Kommuneqarfik Sermersooq: Maajip 15-iat 2015 ilanngullugu.
- Qaasuitsup Kommunia: Maajip 31-at 2015 ilanngullugu.
- Sisimiut aamma Maniitsoq: Maajip 31-at 2015 ilanngullugu.
- Kangerlussuaq: Maajip 15-iat 2015 ilanngullugu.
Atuaruk: Assakaasut naqqullit taarsissanngikkallarnerat pillugu politiit nalunaaruteqarput