Nerisassat
Nuummi nerisassat pillugit meeqqanut festivali
Illoqarfiit pingaarnersaanni meeqqat maanna ulloq naallugu nuannersorpassuarnik ilikkagaqarfiulluartussanillu sammisaqartitsineq, nerisasserineq peqqinnerlu pillugit
Peqqissutsimik Naalakkersuisoqarfik suliffippassuit, meeqqerivippassuit peqatigiiffippassuillu Mamartut festivaleqartitsissapput.
Tamanna kulturip illorsuani Katuami septembarip 17-ani pissaaq.
- Mamartut Festival aqqutigalugu meeqqat periarfissaqarput nerisassat peqqinnartut ilikkarnissaannut sammisat nuannersut aqqutigalugit. Meeqqat nunatsinni inuussutissaatigut paasisaqarfigissavaat minnerunngitsumik aalisakkat. Aalisakkat peqqinnartorsuupput, inuiaqatigiinnullu siunnersuut tassaavoq sapinngisamik aalisagartukulanissaq, peqqissutsimut naalakkersuisoq, Doris Jakobsen (S) tusagassiuutinut nalunaarummi oqarpoq.
Illoqarfinnilu allani
Mamartut Festival Innuttaasut peqqissuunissaannik suliniutip Inuuneritta II-p ilagaa nerisaqarnerup ukiuanik ersersitsisoq, qulequtaqartinneqartoq ‘Meeqqat nerisassallu’.
Festivalip anguniagaraa aaqqissuussamik pilersitsinissaq ukiut tamaasa uteqqiattussamik nuna tamakkerlugu ingerlanneqartartussamik.