Nuuk
Nuummi najugaqarfik nutaaq
Kommuneqarfik Sermersooq Nuummi nutaamik piginnaanngorsaaqqiinermut neqerooruteqalerpoq. Marlunngornermi pisortatigoortumik ammaanersiortoqarpoq
Nuummi piginnaanngorsaaqqiinermut nutaamik neqerooruteqalerpoq.
Tassami sisamanngormat najugaq eqqarsartaatsimikkut inooqataanermikkullu assigiinngitsunik ajornartorsiuteqartunut Nuummi pisortatigoortumik ammarneqarpoq, Kommuneqarfik Sermersooq ilisimatitsivoq.
Najugaqartut sisamat
Illumi najugaqartut sisamaapput, taakkulu ulluinnarni nammineersinnaanerunissamut ikorfartorneqartassapput. Siunissaq ungasinnerusoq eqqarsaatigalugu siunertarineqarpoq illumi najugaqarunnaassasut, taamaakkaluartorli suli pisariaqartitaat naapertorlugu isumassorneqarlutik.
Neqeroorutit siunnerfillit
Winnie Holm Thomsen, ulluinnarni piginnaanngorsaaqqiinermi aqutsisuusoq suliniutip aallartinnissaanut qilanaarpoq.
Taassuma oqaatigaa, Innuttaasut immikkut pisariaqartitsisut imminnut naleqartinnerulernissaat, inuunermik pitsaanerusumik atugaqalernissaat piginnaasaasalu annertusarnissaannut ikorfartuissasut.
- Taamatut nutaamik neqerooruteqarnitsinni, siullermeerluta ataatsimoorussamik aatsaat taamatut suliniuteqartoqalerpoq innuttaasullu aqqutissaannik siuarsarneqarnissaannillu aqunnissaanut siunnerfeqarluta neqerooruteqarsinnaalluta, Winnie Holm Thomsen, Sermersooq.gl naapertorlugu oqarpoq.
Kommunip ilisimatitsissutigaa, piginnaanngorsaaqqiinermut neqeroorut nutaaq Aqqusinersuaq 13-imi ingerlanneqartoq, taavalu ulloq unnuarlu sulisoqarluni.