Nuummi mittarfik: Nipiliorneq aamma mingutsitsineq annertunerusoq nutaamik ASN-mik misissuititsilerpoq
Mittarfiliortiternissamut inatsit amerlanerussuteqartunit akuerineqarneranit ulloq ataaseq qaangiutinngitsoq, avatangiisinut naalakkersuisoqarfik ASN-mik nassuiaammik nutaamik Nuummi mittarfissap sanaartorneqarneranut atatillugu tusarniaassummik nassiussaqarpoq.
Kalaallit Airports Nuummi mittarfimmut suliniummi malunnaatilinnik allannguisimavoq, nutaamillu ASN-mi nassuiaammik suliaqartoqarnissaa taamaattumik pisariaqarsimavoq.
Piumasaqaatit nutaat
Ilaatigut nipip sunniutissaannut, isumalluutinik atuinermut, nunamik mingutsitsinermut, nunap qaani imermut, imermut errortuivikumut aammalu pinaveersaartitsilluni iliuutsinut tunngasunik, siornatigut ASN-mik nassuiaatip 6. februaarimit apriilip pingajuannut 2018-imi tusarniaassutigineqartumut naapertuukkunnaarneranut tunngassuteqarpoq.
ASN-mik nutaamik misissuisoqarnissaanik aalajangerneq, mittarfiliortiternissamut inatsisip Inatsisartuni akunnerni arlalinni oqaluuserineqareerluni pingajussaaneerneqareernerata aqaguani sooq aatsaat saqqummiunneqarnersoq, Naalakkersuisut nittartagaanni atuarneqarsinnaanngilaq.
Innuttaasunik ataatsimiititsineq
Katuami decembarip 11-anni nalunaaqutaq 19.00 innuttaasunik ataatsimiititsisoqassasoq ilisimatitsissutigineqarpoq.
Naalakkersuisoqarfimmi pisortaq Mette Skarregaard Pedersen Sermitsiaq.AG-mut ilisimatitsivoq, ASN-imut nassuiaat nutaaq pingasunngormat pissarsiarisimallugu, nutaarsiassallu ullumikkut aatsaat saqqummiunneqarsinnaaneranut aamma tusarniaanerup aallartinneqarsinnaanerata nassuiaatissartaraa.
- ASN-imut inatsit aqqutigalugu sanaartugassanik annertuunik suliniutit avatangiisinut sunniutai tamarmik sapinngisaq tamaat qulaajarneqarnissaasa qulakkeernissaa uagut suliassaraarput. Kalaallit Airports suliniummut tunngatillugu avatangiisinut sunniuteqartu nutaanik paasissutissaateqartillugu, taava innuttaasut ilaatinneqarnissaat aamma ilisimasanik avitseqatiginissaat uagutsinnut pingaaruteqartorujussuuvoq, naalakkersuisoqarfimmi pisortaq nassuiaavoq.
Unnuami nipiliorneq
Nipiliorluni akornusersuinerit ersarinnerusumik allaaserineqarput, taakkulu illoqarfiup ilaanut sunniuteqassapput. Piffissami 22.00-mt 07.00-imut qaartiterisoqartassanngitsoq, tassani atuarneqarsinnaavoq, kisianni sanaartornerup nalaani unnuakkut nipiliortoqartassaaq.
ASN-imut nassuiaat tusarniaassutigineqareerpat, suliniummi annertuumi avatangiisinut innuttaasunullu sunniutaasinnaasut pillugit pinaveersaartitsinerit naammannersut naggataatigut Naalakkersuisunit aalajangiiffigineqassapput.
- Innuttaasut naammattumik paasitinneqarnissaat pingaartittorujussuuarput, taamaammallu ASN-imut nassuiaat nutaaq pillugu innuttaasunik ataatsimiititsisoqassaaq, Mette Skarregaard Pedersen oqarpoq.
Kalaallit Airportsip pisortaa aamma suliniummik ingerlatsisua Sermitsiaq.AG-p iluatsinngitsumik oqaaseqartinniaraluarpaa.
ASN-imut nassuiaat tamaat atuaruk: Imaqarniliaq teknikkimut tunngassuteqanngitsoq