Lærerige tæsk
Nuummi misigisat puigunaatsut
Sapaatip akunnerata naanerani kingullermi Nuummi Kalaallit Nunaata Danmarkillu assammik arsarlutik unammineri sivisuumik eqqaamaneqassapput
Unamminermi pingasuni tamani qallunaat U-21-mi nunanut allanut unammisartui ajugaagaluarput. Siullermik ilimagineqareersumik kalaallit B-landsholdiinut ajugaallutik, kingornalu kalaallit A-landsholdii ajugaaffigilaartarlugit.
Kalaallilli unammisartut qallunaat tamaviaartittorujussuuvaat. Danmarkip U-21-mi unammisartuisa sungiusaasuat Henrik Kronborg ilimagisaminit tatineqarneruvoq. Kalaallit unammisartut tamakkiisumik tatisipput, assersuinermi saassussinermilu. Unammisartut tamarmik sapinngisartik tamaat tamaviaarput. Unammisartullu Nuup Timersortarfissuanut isiginnaarianit 1000-t missaanniittunit nunanut allanut unammisartuvut, qaqutiguinnaq Nuummi allamiunut unammisartut, tapersersorneqarluartorujussuupput.
Misigisat puigunaatsut naammagisimaarinninnerlu
Timersortarfissuarmi isiginnaartut naammagisimaarinnipput. Inuppassuit, Kalaallit Nunaanni sumi tamaani unamminernik TV-kut malinnaasut, naammagisimaarinnipput. Qallunaat nunanut allanut unammisartut sungiusartinneqarluarput, juulimi Bosnien-Hercegovinami nunarsuarmi pissartanngorniunnermi peqataalinnginnerminni.
Kalaallit sungiusaasuat Niels Møller unammisassamik pitsaanerusumik kissaateqarsinaanngilaq, nunanut allanut unammisartut ukiaru Amerikap Nunavissuani Pissartanngorniunnissamut anngunniunnissat sioqqullugit. Aamma kalaallit unammisartut taama angusarissaartigisimanetik naammagisimaarpaat.
Nunanut allanut unammisarnermi rekordeqartup Rasmus Larsenip, nunanut allanut 101-eriarluni unammisimasup, Sermitsiaq.AG-mik oqaloqatigineqarluni isiginnaartut nersualaartorujussuuvai, nangillunilu:
– Nuummi ikittuinnariarluta unammisaratta Nuummi timersortarfissuarmi misigisaq nalissaqanngilaq. Nalunngilara timersortarfissuarmi isiginnaartut tv-kullu malinnaasut nuannersumik misigisaqartut, aamma ajugaanngikkaluarluta. Takuarput qallunaat sungiusarluarsimaqisut tamatigut saassussinermi eqqortunik aqqutissarsisartut nakkutigillualeraangatsigit. Danmarkimi taamatut unammillaqqissut unamminermik paasinnillaqqissorujussuupput. Najoqqutaq taannaannaq atorlugu ukiorpassuarni sungiusarsimapput. Qujanartumik aamma takuarput assammik arsallaqqittunngortoqarsinnaasoq Kalaallit Nunaanni unammisarluni sungiusartarlunilu.
– Aamma nuanneqaaq timersortarfissuarmiittut taama amerlatigimmata, allanut tamanut atatillugu ilisimasavut.
– Taamaattumik unammisartut sinnerlugit isiginnaariat tapersersuilluarnerannut qutsavigerusuppakka, soorunalumi kikkut tamaasa nunanut allanut unamminernik aaqqissuussisartut qutsavigalugit. Aaqqissuussinermi tamarmi taama tapersersorneqartigigatta soqutigineqartigigattalu suli uggornarnerulerpoq Kalaallit Nunaanni Assammik Arsartartut Kattuffiata, GHF-ip, Amerikap Nunavissuani Pissartanngorniunnissamut anngunniunnissat Nuummi ingerlassinnaanngimmagit.
Kalaallit Nunaanni Assamik Arsartartut Kattuffiat, GHF
Aaqqissuussinerup kingorna GHF-ip siulersuisuinit arfineq-marluusunit najuuttut tallimaat qungujulaarluinnarput. Tassaapput Laila Skytte, Gujo Thorsteinsson, Hans Lyberth, Kristian Heilmann aamma Elise Bruun. Lena Ravn Davidsen aamma Lars Erik Gabrielsen kisimik najuutinngillat.