Nuummi millionilikkuutaanik aningaasaleerusuttut
Nuuk mittarfittaassappat norskit umiarsuaatileqatigiiffiat Hurtigruten illoqarfiit pingaarnersaanni millionilikkuutaanik aningaasaleerusuppoq
Nutaamik mittarfeqalernikkut takornariat arlallit illoqarfiit pingaarnersaannut tikittalissapput, tamaalisoqassappalli norskit umiarsuaatileqatigiiffiata Nuuk pingaarnertut tikittalissavaa.
Umiarsuaatileqatigiiffimmi pisortaaneq Thomas Westergaard Sermitsiaq.AG-mut taama erseqqissaavoq. Taassuma Nuummi kommunaldirektøri, umiarsualiviup pisortaa, Kalaallit Airportsip pisortaa aammalu Sermersooq Business Council ataatsimeeqatigiartorlugit marlunngormat tikippoq.
Turn-around-by
- Mittarfik pilersinneqarpat Nuuk turn-around-illoqarfittut tikittalissavarput, tassani umiarsuarmi ilaasugut paarlaanneqartassallutik, pisortaaneq nassuiaavoq. Ullumikkut umiarsuaatileqatigiiffiup Kangerlussuaq turn-arounditut tikittagaraa, Nuummilu umiarsualiviup sikuneq ajornera pitsaanerutippaat.
Taanna paasissutissiivoq, umiarsuaatileqatigiiffik akunnittarfimmik angisuumik takornarissat ulluni pingasuni illoqarfimmi sammisaqareerlutik umiarsuarmik ingerlaqqinnginnerminni unnuiffigisinnaasaannik sanaartortitsinissamut aningaasaleerusussinnaasoq.
- Akunnittarfik 120-t missaannut inissaqartitsissaaq milliardillu sisamararterutaasa missaanni aningaasaliiffigineqassalluni, umiarsuaatileqatigiiffiup pisortaa ukiut kingulliit angusarissaartarsimaneq pissutigalugu umiarsuaatileqatigiiffiik aningaasaliisinnaassuseqartoq erseqqissarpaa.
Sammisassaqartitsinernut aningaasaliineq
Umiarsuaatileqatigiiffik akunnittarfimmuinnaq aningaasaliinani Nuummilu ingerlatsisut suleqatigalugit sammisassaqartitsinerit assigiinngitsut aamma aningaasaliiffigerusuppai.
- Ukioq kingulleq Svalbardimi akunnittarfiutitsinni 100 million norskit koruunii kaaviaartippagut. Taakku umiatsiamik qamuteralannillu angallassinernit aammalu qimussiussinerniit kaaviaartissimavagut, Thomas Westergaard nassuiaavoq. Taassuma Nuummi pisuttuarnerit, fat bike aammalu ATV-nik angallassinerit inerisarluarneqarsinnaasutut isigai.
Taassuma umiarsuarmik takornariartaatitut sullissinatik misigisassarsiornernillu sullissisuullutik oqaatigaa, tassani sammisassaqartitsinerit akunnittarfimmi unnuinerit angallassinerillu pingaarnertut nioqqutigineqartarlutk. Umiarsuaataat 500-t sinnerlugit ilaasoqarsinnaapput, taamaammat ilaasulli taarsernissaat pilersaarusiorluarneqartariaqarluni.
Illoqarfimmut nalittorsaaneq
- Nuummi annertuumik nalittorsaanissaq suleqataaffigerusupparput. Najukkamilu inuussutissarsiortut soorlu, illussanik titartaasartut, entreprenøret takornarialerisullu suleqatigerusullutigit, taanna erseqqissaavoq.
Taassuma mittarfiit pisortaa Steffen Ulrich-Lynge ataatsimeeqatigileruniuk qanoq angusaqartoqassanersoq pissagassutigaa. Umiarsuaatileqatigiiffiummi aningaasaliinissaanut mittarfimmik pilersitsisoqarnissaa pingaartinneqarpoq.
- Mittarfik 2022-imi aatsaat naammassineqassappat ajorinngilarput. Angallassinerput ukiut marlukkaarlugit pilersaarusiortarparput. Mittarfiliortitsinissarmi aalajangiunneqarnerani piareersimanissarput kissaatigaarput, Thomas Westergaard illoqarfiit pingaarnersaanniillatsiarnermini ilaatigut akunnittarfiup inissisimavigisinnaasaanik alakkaasussaq, nassuiaavoq.
Nuuk qitiutinneqarniartoq
Umiarsuaatileqatigiiffiup Nuuk siunissami Issittumi angallassinernut tamanut qitiusumik inissisimalernissaanik takorluugaqarpoq.
- Nunarsuup assiga qiviarukku Nuuk Sullualummut, Canadamut, Amerikap kangiani sineriaanut Islandimulli sanillersuunnerani qeqqani inissisimavoq, taanna oqarpoq, illoqarfilli pissaganartumik ineriartortinnera malugisimallugu, ilanngullugu erseqqissaatigaa.
Umiarsuaatileqatigiiffik ukiormanna Kalaallit Nunaata imartaani quleriarluni angallassinissamik pilersaaruteqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...