Nuummi meeqqat angerlarsimaffiat nutaaq

Illoqarfiit pingaarnersaata kommuunia illup allanngorlugu sananeqarnissaanut aningaasaliinialersaarpoq, meeqqat inuusuttullu ulloq unnuarlu angerlarsimaffianik kommuunimit ingerlanneqartussamik pilersitsiniarluni.

Kommuunip inissiisarfimmik nammineq ingerlataminik pilersitseqqinnerminni neriuutigaat meeqqat inuusuttuaqqallu ataavartumik toqqissisimasumillu inissiiffissaqarnerat qulakkeernissaat.

Akikitsoq aamma ataavartoq
Sermersooq sanaartornermini aamma sipaaruteqassaaq, namminersortut aamma Namminersorlutik Oqartussat ulloq unnuarlu angerlarsimaffiutaat nalinginnaasumik akisoorujussuummata aamma siumut ilisimaneqanngitsunik immikkut aningaasartuuteqarfiusarlutik.

Kommuuni ulloq unnuarlu angerlarsimaffiutaani Tupaarnaq meeqqanik inuusuttuaqqanillu inissiinermi ullumikkut pitsaasunik misilittagaqarpoq. Taamaattumillu inissiisarfik nutaaq tapertaalluassaaq.

- Kommunimi meeqqat inuusuttuaqqallu kommunimit 100 procentimik neqeroorutaasumut inissinneqarsinnaanerat pitsaaqquteqarluassaaq. Meeqqat inuusuttuaqqallu kommunip piginngisaanni ulloq unnuarlu paaqqinnittarfinni inissinneqarsimasut aalajaannerusumik inissisimaffeqaqqullugit nammineq aaqqissuussatsinnut uterterassavagut, Meeqqanut, Ilaqutariinnut Atuarfeqarnermullu Ataatsimiititami siulittaasoq Poul Hansen (D), tusagassiuutinut nalunaarummi oqarpoq.

Aamma atuaruk: Sorleq pingaarnerua? Meeraq mittarfilluunniit?

Angajoqqaarsiaasartut amerlanerusut
Kommuuni isumaginninnerup tungaatigut nutaanik aamma pilersaaruteqarpoq.

- Ilanngullugu nutaatut inuusuttunut 18-inik ukioqalersimasunut suli toqqissisimanissamik ilitsersorneqarnissamillu pisariaqartitsisunut suliniuteqareernermi malinnaaneq neqeroorutaalissaaq, meeqqanut mikinerpaanut ulloq unnuarlu paaqqinnittarfinni najugaqarnissamik sapernerusunut angajoqqaarsiaasartut siunnerfeqarluta suliniuteqarfigaavut, kommuunimi politikeri oqarpoq.

Illu taanna pisiarinissaanut isumaqatiginninniutigineqarmat kommuunip taanna illu sumiinneranik maanna oqaatiginninnianngikkallarpoq.

Aamma atuaruk: Sermersuup missingersuutit akerliusoqarani akuerai