timersorneq
Nuummi kina nukittunersaava?
Nuummi timigissartarfiit nutaajunersaat unnuk kulturisiorfimmi talerminnermik kikkunnut tamanut unammisitsissaaq
Fittness GL, Team Armwrestling Nuuk suleqatigalugu Nuummi najugalinnut talerminnermik unammisitsissaaq.
Timigissartarfik unnummi kulturisiorfimmi kikkunnut tamanut ammassaaq.
Tassani klubbimi Team Armwrestling Nuuk-mi inuusuttut inersimasullu nukittuut, imaluunniit oqimaassuseq malillugu, unammineqarsinnaapput.
Klubbi nutaaq angusarissaartoq
Tamakkua arlaat ajugaaffigisinnaagukku akissarsiassaqarputit, ingerlatsivik pilerisaarivoq. Aamma kikkut tamarmik unammillertut akornanni makitsisitsisoqassaaq. Team Armwrestling Nuuk illoqarfimmi timersoqatigiit klubbiisa nutaajunersaraat.
Taanna 2015-imi aallartinneqarpoq misilittagalinnillu unammisartoqarluni, ilaatigut 2015-imi Danmarkimi pissartanngortumik Mikkel Andersenimik.
Nunani tamalaani unammiuaarnermi peqataassapput
– Klubbi soqutiginnittunut tamanut, holdimi peqatigiiffiulluartumi ataqatigiiffiulluartumilu peqataarusuttunut, ammavoq, klubbimeersoq Gerth Poulsen oqarpoq.
Klubbi februaarip naalernerani nunat tamalaat unammiuaarnissaanni inersimasunik nukittuunik pingasunik peqataatitaqassaaq. Taakkua tassaapput Mikkel Andersen, Gerth Poulsen aamma Benjamin Noahsen Boye.