Sulorarneq
Nuummi Jens-Frederik Nielsen ajugaalluarpoq
Sapaatip akunnerata naanerani Nuummiut sulorarnermik pissartanngorniutsinneqarput
Sapaatip akunnerata naanerani Nuummi sulorarnermik unamminerpassuit.
Nuummiut pissartanngorniunneranni unamminerit katillugit 144-put U11-niik inersimasunilu A aamma B-it.
Nunanut allanut unammisartoq Jens-Frederik Nielseni pissartanngorniunnermi pingasoriaammik pissartanngorpoq inersimasuni single-rnermi, doublernermi Henrik Jenseni iligalugu kiisalu mixdoublernemi Malu Degni iligalugu, pissartanngorniunnermi aaqqissuisut B-67 taama paasissutissiivoq.
Atuaruk: Sulorartartut Danmarkimi sungiusarlutik tammaarsimaartut
Guldit marluk
Arnani inersimasuni Milka Brønlund marlunnik guldinnappoq, singlernermi doublernermilu Malu Degn iligalugu pissartanngorluni.
Inuusuttuaqqani U-19.nini unamminerit naligiiffiusimapput Per La Cour Vahlilu angutini inuusuttuaqqani pissartanngorluni Ernst Mario Dahlilu sølvinnalluni. U-19-nillu iligiiaarlutik unammineranni Ernst Mario Dahl, Nukaaraq Lund Seritzlevi iligalugu Per La Cour Vahli aamma Peter Frederik Jenseni pissartanngorniutivinnermi unammereerlugit ajugaapput.
U-15-nini Carsten Nitter Sørensen marloriaammik pissartanngorpoq pissartanngorniutivinnermi Inutsiaq Mølgaardi ajugaaffigalugu, iligiiaarnermilu Mads Anderseni iligalugu aamma pissartanngorluni.
Atuaruk: Michael Kleist sulorartartut kattuffianni siulittaasutut qinigaaqqittoq
Pingasoriaammik pissartanngortut
U-13-nini Maluk Christoffersen pingasoriaammik pissartanngorpoq. Unammillertigisinnaasami Aqqaluk Frederiksen aqqunarluni uniinnartariaqarsimavoq.
Taamaasilluni Inuk Lennert sølvinnappoq. Iligiiaarnermi Maluk Christofferseni Inuk Lennerti iligalugu Aqqaluk Frederikseni, Oscar Isbosethsenilu ajugaaffigalugit pissartanngorput. Maluk Christoffersen Emilie Sørenseni mixdoublernermi iligalugu Scott Meineli Christa Munkilu ajugaaffigalugit pissartanngorput.
U-15-nit pissartanngorniunneranni Emilie Sørensen aamma pingasoriaammik pissartanngorpoq, iligiiaarnermi Christa Munki iligalugu, Anna Arlethi Julia Jensenilu unammereerlugit pissartanngorput.
Kredsmesterskaber
Noah Isbosethsen nukarlerni singlemi pissartanngorpoq, Daniel Tindalidi sølvinnattoq.
Nuummiut pissartanngorniutinneqarnerata B-67-ip siulersuisuannit meeraanerusut inuusuttullu unammilluarnerat akersuulluarnerallu nuannaarutigineqarpoq.
Nuummi martsip aallartilaarnerani pissartanngorniuteqqissapput Paamiuniilli peqataasoqassalluni.
Kalaallit Nunaanni sulorarluni pissartanngorniutivinnerit Nuummi påskikkut nalaanni aamma ingerlanneqartussaavoq.
Atuaruk: Frederik Elsner pingasoriaammik Nunatsinni sulorarluni pissartanngorpoq
Pissartanngorniunnermi unamminerit inerneri tamaasa takusinnaavatit allaaserisap talerpiatungaani kakkiunneqarsimasoq.