Nuuk
Nuummi Islandimik ulloqartitsisoqassaaq
Tallimassaa Islandimi ulloqartitsoqassaaq
Kalaallit Islandimiullu niuernikkut suleqatigiffiata Islandimilu avammut niuernermut siunnersuisooqatigiit Nuummi Islandip Generalkonsuuleqarfia Air Icelandilu suleqatigalugit aalajangerpaat Nuummi Islandip ullua tassaassasoq tallimanngorneq oktobarip 24-at.
Islandip ulluanik aaqqissuisarnerup annermik siunertaraa nunat eqqaamioriit akornanni niueqatigiinnerulernissaq kiisalu Islandimi nioqqutissat kalaallinut atuisartunut ilisaritinnissaat. Taamaattumik manna periarfissatsialaavoq suliffeqarfiit kalaallinut niuerusuttut nunat akornanni suleqateqalernissaannut.
Suliffeqarfiit akornanni ataatsimiinnernik aaqqissuisoqassaaq nioqqutissanik kiffartuussinermillu atuisunut nittarsaasoqarluni, isumasioqatigiittoqarluni nunat marluk akornanni periarfissat assigiinngitsut pillugit.
Ukiut tallimassaanni manna aaqqissuussineruvoq siornalu aaqqissuisoqarmat Islandimi suliffeqarfiit aatsaat taamma amerlatigisut peqataapput suliffeqarfiit 30-init amerlanerusut Nuuk tikeraarmassuk.
Peqataanissat soqutigigukku Kristín S. Hjálmtýsdóttir, kristin@chamber.is , imaluunniit Þorleifur Þór Jónsson, thorleifur@islandsstofa.is , attaveqarfigisinnaavatit