Nunatta Isiginnaartitsisarfia
Nuummi isiginnaartitsinermik seminari
Ulluni makkunani Nuummi Nunatta Isiginnaartitsisarfia kajumissutsiminnik isiginnaartitsisartunut seminarertitsivoq
- Ukioq manna ukiut pingajussaarluta sunngiffimmi isiginnaartitsisartunik aaqqissuussivugut, taamaattumillu ileqquliussaq nuannaartorinartoq ukiuni tulleriini aaqqissuussinnaasimasarlutigu. Tamatumani Ilulissaniit, Innaarsunniit, Maniitsumiit, Napasumiit, Qaqortumiit Nuummiillu peqataasoqarluni.
Nunatta Isiginnaartitsisarfiani isiginnaartitsinermut aqutsisoq, Susanne Andreasen, ulluni makkunani kajumissutsiminnik isiginnaartitsisartut seminarertinneqarnerat pillugu, tusagassiuutinut nalunaarummini oqaluttuarpoq.
- Peqataasut sulilluarput aammalu tunniussinnaasaat pissanarluinnartuullutik. Siunertaraarput 2018-mi sunngiffimmi isiginnaartitsisartunik pikialaartitsiniarluta, tamatumanilu siunertaralutigu piareersarfigereerlugit isiginnaarutissiatik takutissinnaasarumaaraat. Ukioq manna Kangaatsiameersunik peqateqarnerput iluarisimaarparput, taakkumi aaqqissuussamut pissanganarnernerulersitsiinnarsimammata, Nunatta Isiginnaartitsisarfiani isiginnaartitsinermut aqutsisoq oqarpoq.
Isiginnaartitsinerit
Ukioq manna peqataasut Ilulissaneerput, Qaqortuminngaaneersuupput, Kullorsuarmeersuupput Innaarsummeersuullutillu.
Taakkua tamarmik takinngitsumik aggerfimminniit nassataminnik maanilu naamassisaminnik takutitaqarniarput.
- Peqataasut isiginnaartitsisartumit/ilitsersuisartumit Gitte Gry Ballesheim-imit ilitsersorneqarlutillu ilinniartitinneqarput. Taanna ulluinnarni Dansk Amatør Teater Virksomhed-imi (DATS-imi) atorfeqartuuvoq, matumanilu Nunatta Isiginnaartitsisarfia suleqatigalugu aaqqissuusseqataasimalluni. Tamatuma saniatigut peqataasut Jose Joelsen-i ilitsersuisoralugu qilaatersornermik taavalu isiginnaartitsisartoq Connie Christoffersen-i ilitsersuisoralugu uaajeernermik ilinniartinneqarlutik.
Arfininngorpat isiginnaartitsisartut 'Kajumikkut' Kangaatsimaninngaanneersut isiginnaangassiaq 'Kiinappak' takutissavaat.
- Takutitassaq taanna meeqqanut mikinernut naleqqutinngilaq, tamatumani atornerluisarneq sakkortuunngorlugu takutitassiariniarneqarmat.