ineqarneq
Nuummi inuit nammineq inissaminnik sanasariaqarput
Ineqarneq pillugu inatsisit nutaat nutaanik sanaartorneq ullumikkornit nunap sinneranut siammarnerussavaat
Nuummi inuppassuit namminerisaminnik ineqarput, taarsigassarseriaaseq iluanaarnartoq 20-20-60 atorlugu namminerisaminnik inigisartik aningaasalersinnaasimagamikku.
2027-mi januaarip aallaqqaataani tamanna taamaatissasoq, Sermitsiaq aviisi aqagu tallimanngornermi saqqummertussami allaaserinnippoq.
Ineqarnermut Naalakkersuisoq Erik Jensen Siumumeersoq Inatsisartut ukiaanerani ataatsimiinneranni ineqarnermut inatsisissanik marlunnik saqqummiussissaaq taamaalilluni piginneqatigiilluni inissianik namminerlu inigisanik ullumikkut tapeeriaaseq allanngortinneqarluinnassalluni – pisunilu Nuuk ajorsartuussaaq.
– Ineqarnermut marlunnik inatsisiliornerup siunertaraa namminerisamik inissialiornerup Nuummiit nunatta sinneranut siammarnerunissaa, Erik Jensen tunngavilersuivoq.
Nunatsinni illoqarfiit pingaarnersaannik sumiginnaanertut isiginngilaa, maannakkulli aningaasaqarnikkut inissisimaneq aallaaviginerarlugu niuerfimmilu piumasaqaatit tunngavigalugit aningaasaliisoqarnissaanut periarfissaqarmat ilaatigut aningaaserivinni realkreditimilu taarsigassarsinikkut.
– Ullumikkut Nuummi inissianik niuerneq ima angitigalunilu patajaatsigaaq nunatsinni illoqarfiit pingaarnersaanni inissaqarnikkut tapiisarneq annikilliartuaartinneqarsinnaalluni, Erik Jensen oqarpoq.
Aamma Naalakkersuisut tapiissuterpassuit Nunatta karsianiit kommunit karsiinut nuunniarpaat, taamaalilluni siunissami kommunit kisimik piginneqatigiilluni namminerlu pigisanik inissialiornermi pisortanit taarsigassarsianit agguaasinnaalerlutik.
Ukiut tamaasa Nunatta karsiata namminerisamik inissialiorneq 35 million koruuninik tapertarpaa.
Allaaserisaq tamakkerlugu sapaatip-akunnerani Sermitsiap saqqummersitassaani atuaruk, aviisi aqagu tallimanngorpamiit pisiniarfinniilissaaq. Uanilu aviisi pisiassaalereerpoq: