Nuummi innutaasut 400-t nalliuttorsiorluni arpanneq peqataaffigaat
Timersuutaarniarfik Ittu.net sapaammi nalliuttorsiornermik arpannermik aaqqissuussivoq Maaji Nuanimut tapiliussatut
Sapaatiummat ullup-qeqqanut timersuutaarniarfik Ittu.net ukiut 20-ssaannik nalliuttorsiorluni arpatsitsinermik aaqqissuussivoq, qiianaraluaqisoq inuit 400 arpaqataapput isorartussutsini 3, 10 aamma 20 kilometer.
Arpanneq aallartissammat Nuuk Centerip saavani inuppassuit assigiinnik tujuuluarallit katersuussimapput Ittu.net-ip nalliuttorsiornermininut atatillugu sanatissimasani peqataasussanut agguaassimammaigit. Tujuuluaqqat tungujortooriarmata allanngillat smølferpassuit qalipaatit taakkununnga assingummata. Qujanartumik smølfit arpattartut amerlanerussuteqarluarput taakkualu apuuteqqaanniullutik.
Arpannissaq sioqqullugu Ittu.net fysioterapeutimit Morten Jensenimit aamma arpattartutut unammisartumit Liza Tuperna Itzchaky, orninneqarput arpattartut pisinniarfimmik atuisartut siunnersorneqarlutik, innersorneqarlutik nutaanillu isumassarsisinneqarmata.
Arpannikkut aamma ersersinniarneqarpoq maaji qaammat assigiinngitsorpassuarnik timersornissanik pilersaarusiorfigineqarsimasoq najartulersoq. Qaammammi ulapaarfioqisumi arpattoqarnikuuvoq, nalunnguartoqarluni, timi atorlugu bingortoqarluni pisuttuaqatigiittoqarlunilu tamarmik Maaji Nuannimut tunngassuteqartut.
Sapaatip-akunnerani uani Maaji Nuan naggataarlugu innuttaasunut makku neqeroorutigineqarput; karate, tilluunneq, kalattoorneq, yoga arfininngorpallu naggataarnersiorluni arpanneq nal. 18.30.
Ittu.netip arpatsitsineranit inernerit suli piariinngillat. Ullumi kingusinnerusukkut ittu.net.gl-imut ivertiterneqarumaarput.