Qinngorput
Nuummi inissiat sanaartugassat affaannanngortut
Namminersorlutik Oqartussat Nuummi Qinngorpumi inissiat sanaartugassatik 100-t 50-iinnanngortippaat. Tamanna pivoq eqqaamiuusussat isumaqataannginnerisa kingorna
Nuummi Qinngorpumi inissiaqarfiup Suloqqap ataatungaani inissiat 100-t inissiarsuarni arfinilinni, Namminersorlutik Oqartussanit sananeqartussatut pilersaarutaasimasut, maanna sanaartortussamit inissianut 50-iinnarnut ikilisinneqarsimapput sanaartorfiusussap eqqaamiuisa isumaqataannginnerisa kinguneranik.
Kommuneqarfik Sermersuumi kommunalbestyrelsimi amerlanerussuteqartut siorna oktobarip qaammataani kommunimut pilersaarut akuersissutigigaluarpaa inissiarsuarnik arfinilinnik sisamanillu quleriilinnik kingunilimmik sanaartorfiusussaq.
Kisianni maanna sanaartortussat, tassalu Namminersorlutik Oqartussat, aalajangersimapput inissiat 100-niit 50-inut ikilisiutigalugit inissiarsuit quleriit sisamaniit pingasunut appartinniarlugit, taamaalilluni inissiarsuit inissisimanerat Suloqqami inissianiit appasinneroqqullugu isikkivimmik assiinnginniassammat, taama Kommuneqarfik Sermersuumi aningaasaqarnermut ataatsimiisitaliamut allannguutissatut eqqartugassatut saqqummiussami allassimasoqarpoq.
Atuaruk: Nuummi inissianik nutaanik 100-nik sanaartortoqalerpoqrnissaa pilersaarutigineqarpoq
Isumaqataanngitsut
Kommuneqarfik Sermersuumit paasissutissiissutigineqartut naapertorlugit piginneqatigiilluni peqatigiiffik ‘Ejerforeningen Pingorsuaq 1’ marloriarluni tusarniutinut akissuteqarsimasoq aamma najugaqartoq alla ataaseq akissuteqarsimavoq.
- Akissuteqaatit tiguneqartut inissiat isikkiviisa ajornerulernissaanut aammalu pinngortitap sukisaarsaarfiillu ajornerulernissaannut tunngassuteqarput. Akissuteqaatit tunngavigalugit sanatitsisup inissiat quleriit quleriivisa amerlassusaat ikilineqarnissaat aalajangiuppaa. Taamaattumik inissiat quleriiusut arfiniliusut sisamaannanngortinneqarput, quleriillu sisamaniit pingasuinnanngortinneqarlutik, aningaasaqarnermut ataatsimiisitaliamut allannguutissatut eqqartugassatut saqqummiussami taama allassimasoqarpoq.
Inissiat ilaqutariinnguanut, kisermaanut aappariinnullu utoqqaanerumaanut naleqquttunik inissiartaqartussatut pilersaarutaapput.