alarm
Nuummi inissiaq ikuallattoq
Tallimanngormat unnukkut blok 34-mi inissiaq ikuallattoq saniliisa inuillu eqqaaniittut paasigamikku tupattorujussuupput
Inuit arlallit imminnut attuumassuteqanngitsut tallimanngormat unnukkut nal. 23 missaani politiinut kalerriipput Nuummi Lyngby-Tårbækvejimi blok 34-mi inissiaq ikuallattoq paasigamikku.
– Nal. 23 sioqqutilaarlugu arlallit sianerput oqaluttuarlutillu inissiamik ikuallattoqartoq. Oqartoqarpoq inuit arlallit inissimiittut ikioqqullunilu suaartartoqartoq. Piffissap sivikitsuararsuup ingerlanerani politiit, ambulancit qatserisartullu takkupput, Nuummi Poligtiini pigaartoq oqaluttuarpoq. Taamali pinartigisimanngilaq. Nuummi Politiini pigaartoq oqaluttuarpoq ikuallannermi ajoqusertoqarsimanngitsoq, sanililli ilaat putsumik ajoqusersimasinnaasut.
– Kissarnerujussuarmik pilersitsoqarpoq, igalaat tamarmik qaarput kissarnerujussua pissutigalugu. Inissiami marluk najugaqarput. Takkukkatta aappaa silataaniippoq aappaalu angerlarsimanngilaq. Inissiaq tamavimmi ikuallappoq najugaqartullu inisseqqinneqarput. Ikuallannermilu sanilit putsumik annertuumik ajoqusersimasinnaapput.
– Ikuallanneq sukkasuumik qaminneqarpoq. Allattaavinni allassimavoq nal. 23.22 qamissimasoq, paasineqarsimasorlu ikuallanneq sinittarfimmi aallartissimasoq, suliassarlu naammassisutut isigaarput, Nuummi Politiini pigaartoq Sermitsiaq.AG.mut oqarpoq.