illunik niuerneq
Nuummi inissianik nioqquteqarneq ingerlalluartoq
Inissiat piumaneqarnerat illunik tuniniaasartut malinnaavigisinnaanngilaat.
Nuummi illunik nioqquteqartartut piffissami matumani ulapipput. Ulapittorujussuupput. Illunik inissianillu niuerfimmi kaaviiaartitat 2018-ip aallartinnerani qaffasissorujussuupput, Grønlands Ejendomskontorimilu malinnaasinnaajumalluni sukkasuumik arpattariaqarput.
Illunik inissianillu niuerneq ingerlalluartoq
- Illunik inissianillu niuerfimmi piffissami matumani ingerlalluartoqarnera qularutissaanngilaq. Maannakkorpiaq piserusuttut nioqquteqarusuttunit amerlanerujussuupput, inissianillu nutaanik pissarsigaangatta taakkua ima tunineqalertortigisarput nutaanik taarsernissaannulluunniit piffissaqarpiassangata, tamannalu nittartakkatsinni piffissami matumani aamma takuneqarsinnaavoq, Grønlands Ejendomskontorip pisortaa, Laarseeraq Chemnitz Egede, oqaluttuarpoq
Suliffeqarfiup nittartagaani illunik inissianillu nioqquteqartartoq inissiat illullu katillugit 32-t sapaatip-akunnerani 7-imi tuniniarneqartut ilaannut 14-inut ”tunineqareerpoq”-mik nalunaaqutsiisariaqarsimavoq.
Suliffinnik nutaanik pilersitsisoq
Illunik inissianillu niuerfimmi januaari nalinginnaasumik ulapaarfiusarpoq kaaviiaartitaqarfiulluartarlunilu, kisianni piserusuttut soqutiginninnerata annertunerujussua tuniniaasartut misilittagartuujugaluartulluunniit tupaallaatigaat.
- Ukiup nikinneraniilli illut inissiallu 13-init ikinnerunngitsut tunisimavavut, Laarseeraq Chemnitz Egede oqaluttuarpoq, naliliillunilu, ulapaarneruleriartornerup ilaa suliffeqarnermut kiisalu ukiup aallartinnerani atorfinni nutaani aallartinnermut attuumassuteqartoq.
Allaaserisaq Nuuk Ugeaviisimi tamakkerlugu atuaruk. Aviisi akeqanngitsumik uani aaneqarsinnaavoq: