ikuallattoq

Nuummi ikuallanneq angutip 23-nik ukiullip inuuneranik akeqarpoq

Nuummi inissiami arfininngornermi sakkortuumik ikuallanneq angutip 23-nik ukiullip inuuneranik akeqarpoq. Angut alla aamma inissiamiittoq uutitersimanini putsumillu najuussuisimanini pissutigalugit napparsimmavissuarmut unitsinneqarpoq

Nuummi arfininngornermi sakkortuumik ikuallattoqarnera angutip 23-nik ukiullip inuuneranik akeqarpoq.

Angut inuusuttoq 23-nik ukiulik Nuummi Nuussuup ilaani Paarnat 14-imi inissiap sakkortuumik ikuallanneranut atatillugu ajunaarpoq.

Atuaruk: Assit takukkit: Nuummi Nuussuarmi inissiaq ikuallattoq

Angut alla 23-nik ukiulik aamma inissiamiissimavoq, taannalu uutitersimanini putsumillu najuussuisimanini pissutigalugu napparsimmavissuarmut unitsinneqarluni.

Arfininngornermi ullaap-tungaani kalerriutigineqartoq

Politiit ikuallattoqarneranik sanioqquttunit, inissiamit pujortorujussuuneranik takunnittunit, nal. 09.43 kalerrinneqarput.

Politiit annaassiniartartullu ornigukkasuarput ikuallannerlu pilertortumik aqussinnaalerlugu.

Annaassiniartartut inissiami inuit marluk nassaaraat, aappaa uumassuseqanngitsoq taannalu napparsimmavissuarmut apuunneqarnermini toqoreersimasoq nalunaarutigineqarluni.

Inissiamiittup aappaa uutitersimanini putsumillu toqunartumik najuussuisimanini pissutigalugit napparsimmavissuarmut unitsinneqartoq, politiit ilisimatitsissutigaat.

Pineqartut taakkua marluk angutaapput, tamarmillu 23-nik ukioqarlutik.

Inuit arlallit unitsinneqartut

Ikuallattup pujornerujussuata kinguneranik inuit arlallit inissiani qanittumiittut Dronning Ingridip Napparsimmavissualiaanneqartariaqarsimapput putsumik najuussuisimanerminnut atatillugu nakkutigineqassallutik.

Ikuallannermut pissutaasoq suli ilisimaneqanngilaq

Politiit ikuallattoqartillugu paasiniaasartunik teknikerinik tikisitsissapput maannalu namminneq paasiniaallutik, ikuallannermulli pissutaasumut atatillugu maannamuugallartoq annerusumik paasissutissiisinnaanatik. Toqusup toqqutigisaanik paasiniaanermut atatillugu nakorsamik toqusut timaannik misissuisartumik Danmarkimit tikisitsisoqassaaq.

Ikioqqusut

Politiit innuttaasunit paasiniaanermut atatillugu paasissutissiisinnaasunit saaffigineqarusupput.

Saaffiginninneq pisinnaavoq 70 14 48-mut sianerluni imaluunniit Nuummi politeeqarfimmut nammineerluni ornigulluni.

Powered by Labrador CMS