Nuuk
Nuummi ikuallaavik iluarsartuunneqartoq
Ikuallaaviup iluarsartuunneqarnera septembarimi naammassinissaa naatsorsuutigineqarpoq
Nuummi ikuallaavik ukiut 26-t matuma siorna atorneqalersoq annertunerusumik iluarsartuunneqarsimanngilaq. Pitsaanerulernissaa anguniarlugu maannakkut iluarsartuunneqarpoq, aamma eqqakkat suliarineqartartut 10 procentimik annertunerulernissaat anguniarlugu nutarterneqarluni.
Tamanna Kommuneqarfik Sermersuumit tusagassiuutinut nalunaarutigineqarpoq.
- Piujuartitsinikkut eqqakkanik passussisarneq pingaartilluinnakkatta ilagaat. Kommunimi sulisut eqqakkanik passussinermi pikkorissigaluttuinnarneri nuannaarutissaavoq. Ukiuni kingullerni eqqakkanik passussisarneq annertuumik pitsanngoriaateqarpoq, tamatumalu kingunerisaanik ikuallaaviup piginnaasai pitsaanerusumik atorluarneqarnerulissapput, iluarsartuussinermut avatangiisinullu ataatsimiititaliami siulittaasoq Inuit Ataqatigiinnit Mille Søvndahl Pedersen tusagassiutinut nalunaarummi oqarpoq.
Eqqakkat uninngatinneqarallartut
Ikuallaaveqarnermut atortorissaarutit pitsaanerpaat atorneqalissapput suliarineqareeriarpat.
- Ikuallaavik iluarsartuunneqaraluartoq suli atorneqarpoq. Nuummi akunnermut 1,6 tonsinik eqqaavinnut igitsisoqartarpoq, ullormut 40 tonsiulluni, Kommuneqarfik Sermersooq allappoq.
Ikuallaavimmi ikuallaasoqarsinnaanngikkallarmat eqqakkat ataatsimut ilineqartarput ikuallaaviup suliarineqareernissaata tungaanut ikuallariaannanngorlugit. Eqqakkat 1600-ni poortukkat ataatsimoortinneqarallarput, ikuallaavik atuutileqqeriarpat ikuallariaannanngoqqallutik. Taamatut aaqqissuussisoqarnerani tikka najoruminarpallaarnavianngilaq, kisianni tikka naviananngitsuusoq Kommuneqarfik Sermersooq allappoq.
Ikuallaavik septembarimi suliarineqareeruni atuutileqqissaaq.