unammiuaarneq nutaaq
Nuummi futsal nuannarineqarluartoq
Sapaatip akunnerata naanerani illup iluani arsaalluni illoqarfimmi nutaamik unammiuaartoqarpoq, unamminerillu ingerlanneranni Arctic Winter Gamesimut misiliisoqassaaq
Kalaallit Nunaata Danmarkillu 2015-imi novembarimi Inussivimmi unamminerat illup iluani arsaannermut futsalimut, nalinginnaasumik arsaannermut assingusorujussuarmut, amerlasuunut isinik ammaasuusimavoq.
Futsalimik unamminerit sukkasuumik ingerlanneqartarput nalinginnaasumillu arsaannermit amerlanerusunik isaatitsisoqartarpoq.
Taamaattumik amerlasuut timersuut taanna aallutilersimavaat, NBU-llu, Nuuk Boldspil Unionip, nutaatut illoqarfimmi futsalimik unammiuaarneq aallartippaa, tassani arnani angutinilu inersimasut klubbii unammiuaartinneqarlutik, tamarmillu ikinnerpaamik ataasiarlutik imminnut unammissallutik.
Runde siulleq sapaatip akunnerata nanerani uani - januaarip 16-ianni 17-iannilu 2016 - ingerlanneqarpoq, illoqarfimmilu unammiuaarneq marsip naanerata tungaanut ingerlanneqassaaq. Unamminerit akeqanngitsumik isiginnaariarnissaannut kingusinaanngilaq (unamminissast ataani takukkit, aaqqiss.).
Medalje-natsitsineq misilinneqassaaq
Tamanna peqatigalugu runde siulleq misiliutitut taaneqarpoq, Arctic Winter Gamesimi futsalimik unammiuaarnissanut.
– Immikkut illuinnartumik sapaat una illoqarfimmi unammiuaarnerup avataani medaljenanniuffiussaaq, Nuuk Boldspil Unionimi siulittaasoq Christian Laursen oqarpoq.
– Siunertatuaavoq AWG-mi medaljenatsilluni persuarsiornerup misilinneqarnissaa. Nunanut allanut unammisartut amerlasuut klubbertyik sinnerlugu unammeqataasarput. Taamaattumik aggerit isiginnaariarlutillu, taamatut kajumissaarusioqarpoq.