assit takukkit
Nuummi eqaarsaarnermik takutitsinersuaq
Arfininngormat meeqqat inuusuttullu 85-it missaanniittut ilaquttanut takkuttunullu allanut ataatsimoorlutik eqaarsaarnermik takutitsipput
Nuummi Eqaarsaartartut Peqatigiiffiat arfininngormat peqatigiiffimmi akunnerpassuarni sungiusartarnermik inernerannik takutitsiniarluni qaaqqusivoq. Takutitsineq isaaqatigiinnermik aallartinneqarpoq taamatuttaarlu aniaqatigiinnermik naggaserneqarluni.
Takutitsineq holdinut arlinnut immikkoortiterneqarsimavoq. Taamaasilluni meeqqat eqaarsaarnermik takutitsipput, eqaarsaarnermik rytmiskimik takutitsisoqarpoq, pissilluni eqaarsaarnermik takutitsisoqarpoq inersimasullu eqaarsaarnermik takutitsillutik. Takutitsinerit ajornassusiat eqaarsaartartut piginnaasaqarnerat malillugu nikerarput.
Sungiusaasut tunniusimasut
Nuummi Eqaarsaartartut Peqatigiiffiat kajumissutsiminnik ingerlatsisunit ingerlanneqarpoq, taamaasillunilu kajumissutsiminnik ilungersuutiginnittut 15-it missaanniittut meeqqat 175-it missaanniittut sapaatip akunnikkaartumik sungiusartittarpaat. Tamatuma saniatigut sungiusaasunik arlalinnik ikiorteqarpoq pingaartumik eqaarsaartartut utoqqaanerit, tamakkualu sungiusartitsinerni pinngitsoorneqarsinnaanngillat.
Siorna eqaarsaartartut arlallit, peqatigiiffimmi sungiusaasutut ikiortaasut, Ollerup Højskolimut sungiusariarput. Taamaasillutik sungiusartitsinerminni pingaarutilinnik atortussaqalersimapput. Ukioq manna siunniunneqaqqippoq gruppimik aallartitseqqinnissaq, tamannalu piviusunngortinniarlugu peqatigiiffik tamaviaarluni sulivoq. Ilanngullugu maanna sungiusaasuusut arlallit aallartussaapput, taamaattumillu taartissaqartinnissaat pisariaqartinneqartorujussuuvoq.
Kakkaginaqaat
Arfininngormat takutitsinerup takutippaa eqaarsaartartut peqatigiiffianni eqaarsaartartut ilaat eqaarsaallaqqissorujussuanngorsimasut. Eqaarsaartartit arlallit pissittarneri kakkaginaqaat. Utoqqaanerinnaanngitsut, aammattaarli eqaarsaartartut inuusunnerit arlallit eqaarsaallaqqeqaat.
Suli ingerlalluarpoq
Nuummi Eqaarsaartartut Peqatigiiffiat siorna ukiunik 15-inngortorsiorpoq, ilaalli isunaqarput suli pisoqaanerusoq. Ukiuni kingullerni marlunni peqatigiiffik ineriartorluartorujussuusimavoq. Tamatumunnga minnerunngitsumik pissutaavoq peqatigiiffiup siulittaasua Nicolaj Graversen, peqatigiiffik ineriartortinniarlugu tamaviaarsimaqisoq.
Eqaarsaartartut peqatigiiffiat atortunik nutaanik pisiniarnissaminut aningaasaateqarfinnut qinnuteqaqqammersimavoq. Tamanna iluatsissappat peqatigiiffik killeqanngiusartumik periarfissaqalissaaq - taanna isumalluarluni oqarpoq.
Assit ataani takukkit