Nuummi bussit angarlavii ima allannguiffigineqarput

Nuup Bussii pitsaanerusumik atuisuminnut sullissiniarlutik allannguuteqartitsipput.

Allannguutit taakku Nuup Bussiisa ataasinngornermi novembarip ulluisa qulingani ataatsimoorussamik angallannermut pilersaarummi, kommunalbestyrelsimit aalajangerneqartumi immikkoortutut kingullertut atuutsiligassaasa ilagaat.

Nuup Bussii tusagassiutinut nalunaaruteqarput.

Bussit amerlanerusut sullisseriaatsillu pisariinnerusut bussiutileqatigiiffimmut aqqutaapput, maannalu soorlu bussit angallavii, maannamut rute 2-mik, 2A-mik aamma X2-mik taaguuteqarsimasut assigiiaartunngortinneqarput.

- Maannamut rute 2 Qajaasanut (Nathalies) kaajallattarpoq, aammalu 2A Ilisimatusarfimmut ingerlasarluni. Siunissami Qajaasanut Ilisimatusarfimmullu angallavik ataasiinnanngussaaq. Tassalu rute 2 ataasiinnanngussaaq, tassanilu piffissaq ilalaarparput, taamaalillunilu angalanernut pilersaarut ”tasilaarparput”, tamatumalu kingunerisaanik ingerlaneq eqqissisimanerusumik ingerlanneqarsinnaalissaaq. Ullaakkut ualikkullu piffissani angallaffiunerpaani suli bussit minutsit qulikkaarlugit takkuttarnissaat isumagissavarput. Akerlianik aqqut takinerulaalertussaammat rute 2-mi bussit ullup qiteqqunnerani minutsit 20-ikaarlugit unnukkullu minutsit 40-kkaarlugit takkuttassapput, Nuup Bussiini pisortaq Michael Driefer oqarpoq.

Allannguutissaq annertooq alla tassaavoq, siunissami atuartunut angallavinnik immikkut ittunik ingerlasoqarunnaassammat. Maannamut rute 4 aamma 5 atuartunuinnaq bussitut atorneqarsimapput, kisiannili nukiit taakkununnga atorneqartut angallavinnut allanut, tamanit atorneqarsinnaasunut nuunneqassapput. Allatut oqaatigalugu bussit ikinnerulissanngillat – kisiannili angajoqqaat atuartullu bussini ingerlaqatigiissinnaalissapput. Atuartut maannamut rute 2-mi akeqanngitsumik ilaasinnaasimanngillat, kisiannili ataasinngorneq novembarip ulluisa qulinganiit aallarnerfigalugu ulluni atuarfiusuni tamani nal. 18 tikillugu angallavinnut tamanut akeqanngitsumik ilaasinnaalissapput.

Mittarfimmut rute 3 aamma pitsannguiffigineqassaaq. Taanna ualip annersaani uninngasarpoq, kisiannili siunissami ulloq tamakkerlugu angalasalissaaq, taamaalillunilu mittarfimmut mittarfimmiillu angalanissaq ajornannginnerulissaaq. Ullaakkut ualikkullu nalunaaquttap akunneranut marloriarluni takkuttalissaaq, tamatumalu saniatigut aqqut allannguiffigineqassaaq, taamaalilluni rute 1-itut Qinngorpumiit illoqarfimmut, aammalu illoqarfimmiit Nuussuarmut toqqaannartumik tassanngaanniillu mittarfimmut ingerlasalissalluni.

- Sullitatta mittarfiup sullinneqarnerata pitsaanerulernissaanik kissaateqarnerat tunngavigalugit taamatut allannguivugut. Tamatuma saniatigut Qinngorpumit aqqutit allanngornerini atuisut rute 1 / 1A-mut aamma 3-mut ilaallutik illoqarfimmut toqqaannartumik ingerlasinnaalissapput, taamaalillunilu pingaartumik ullaakkut suliartorfiup nalaani pisinnaasat annertunerulissapput. Aamma siunissami illoqarfimmiit rute 2 atorlugu Nuussuarmut toqqaannartumik ingerlasoqarsinnaalissaaq, kiisalu Nuussuarmiit mittarfimmut bussinut allanut nuunngikkaluarluni mittarfiliartoqarsinnaalissalluni. Taamaalilluta ilaasut piffissami angallaffiunerpaasumi bussinut amerlanerusunut pitsaanerusumik agguarsinnaalissavagut, Michael Driefer oqarpoq.